"ОИЛА МУСТАҲКАМЛИГИДА АЁЛЛАРНИНГ ЎРНИ"

Ўзбекистон халқ демократик партияси Марказий кенгаши "Фаол аёллар" қаноти ҳамда партиянинг Андижон вилоят кенгаши ҳамкорлигида Олтинкўл туманида "Оила мустаҳкамлигини таъминлашда аёлларнинг ўрни" мавзусида амалий семинар бўлиб ўтди. Семинарда "Мустаҳкам оила йили" давлат дастурида белгиланган вазифалар ижросини таъминлаш, хотин-қизлар фаоллигини ошириш, оилаларни мустаҳкамлаш, маънавиятини юксалтириш, ёш оилаларни қўллаб-қувватлаш, шунингдек, оила билан боғлиқ моддий ва маънавий муаммоларни ҳал этиш, фарзанд тарбиясида самарали ва ўзига хос усулларни қўллаш масалалари, ушбу йўналишларда амалга оширилаётган ишлар, муаммо ва камчиликлар хусусида атрофлича сўз юритилди.

- Мазкур семинар аёлларимиз учун жуда фойдали бўлди, - дейди Олтинкўл тумани ҳокимининг ўринбосари, хотин-қизлар қўмитаси раиси Матлубахон Мўминова. - Иштирокчилар иш фаолиятларини такомиллаштириш борасида ўзаро тажриба алмашдилар, билим ва малакаларини оширдилар.

Семинар доирасида хотин-қизларни иш билан таъминлаш, уларни тадбиркорликка жалб этиш мақсадида туман бандликка кўмаклашиш ва аҳолини ижтимоий муҳофаза қилиш маркази билан ҳамкорликда меҳнат ярмаркаси ўтказилди.

Ф. ИБАЙДУЛЛАЕВ.