БИЛИБ ҚЎЙГАН ЯХШИ

ҚОМАТИНГИЗНИ ТИК ТУТСАНГИЗ ЖОЗИБАЛИ КЎРИНАСИЗ...

Француз мутахассисларининг таъкидлашича, ўн олти ёшли қизлардан кўра эллик ёшли аёллар гавдаларини мағрур тутиб юра олишлари анча осонроқ экан. Нега дейсизми? Унда эшитинг.

Баъзи аёллар бир қарашда ҳам чиройли, ҳам келишган кўринадилар. Лекин нима қилсалар ҳам уларда жозиба, зеболик кўринмайди. Бошқа аёлларнинг эса кичкина чандиқлари ҳам ўзига жуда ярашиб туради. Бундай аёлларнинг юзларидаги баъзи нуқсонлари, юришлари, ўзини тутишлари олдида катта аҳамиятга эга эмасдек кўринади. Улар қоматини тик тутган ҳолда бошини кўтариб енгил қадам ташлайдилар. Бундай аёллар гавдани тик тутиб, аёлларга хос латофат билан юриш замонавий, қимматбаҳо кийимлардан кўра уларга кўпроқ чирой бахш этиб туришини тушуниб етганлар.

Тенгдошларингиз қоматларини тик тутиб юришларига аҳамият бермасдан турли кийимларга пул кетказаётган бир пайтда сиз бир кийимда бир неча йил юриш мумкинлигини ўйлаб кўринг.

Қоматни тик тутиб юришни ҳамма ҳам уддалайвермайди. Бироқ сиз ҳаракат қилиб кўринг, албатта яхши натижага эришасиз. Чиройли қадам ташлаб юрган аёлларнинг ташқи кўринишидаги баъзи бир камчиликлари умуман сезилмайди. Чунки ҳамма ўз эътиборини аёлнинг енгил қадам ташлашига қаратади. Озғин, лекин букчайиб юрган қизлардан кўра текис гавда билан қадам ташлаётган тўла қизлар чиройли кўринади. Текис қоматингиз атрофдагиларга ўзингизга бўлган ишончингиз, ҳаётда аниқ бир йўлни танлаб мағрур ҳолда кетаётганингизни билдиради. Ишонаверинг, сизнинг ёшингизда бу хислатларни кам деб бўлмайди. Кўзгу ёнига келиб қоматингизга бир қиё боқинг. Бошингизни сал юқорига кўтаринг, елкаларингизни тўғри тутиб қорнингизни ичга тортинг. Гавдани тўғри тутишнинг ҳеч қийин жойи йўқ. Уни ҳар куни тўғри тутишни ўрганиш керак. Фақатгина текис йўлда эмас, зинадан ҳам тўғри чиқиб-тушишни билишингиз керак. Оёғингиз учида зинадан чиқишингиз ҳам тўғри бўлмайди.

Қизларга, ўзбек аёлларига доимо ҳусну латофатли бўлиб қолишларини тилаб қоламиз.

Тайёрловчи: Озода ОЛИМОВА.