САНЪАТИМИЗ ЮЛДУЗЛАРИ

"МАШҲУРАДАН ЎЗИМ ҲАМ НАФРАТЛАНГАНМАН"

Шодия Тўхтаева Тошкент давлат санъат институтининг биринчи курсида таҳсил олаётган пайтидаёқ, Ўзбек Миллий академик театрининг режиссёри эътиборига тушган. Бундай омад санъаткор бўлишни истаганларнинг барчасига ҳам кулиб боқмайди. Бундай эътиборга сазовор бўлиш учун албатта, ёрқин истеъдод соҳиби бўлиш керак. Шодия Тўхтаева ана шундай ноёб қобилиятли актрисалардан биридир. Шу боис, у ёш бўлишига қарамай, қисқа давр ичида тетр ва кинода бир қатор ажойиб роллар ижро этишга улгурди. Қуйида у билан бўлган суҳбатни Сиз газетхонлар эътиборига ҳавола этамиз.

- Айтингчи, нима сабабдан кўпроқ салбий ролларни ижро этасиз?

- Эҳтимол, режиссёрлар мени ижобий ролларда ҳам тасаввур қилишар. Бироқ салбий қаҳрамонларни ижро этишни ўзим яхши кўраман. Чунки бундай образлар санъаткорнинг қирраларини тўлароқ очиб беради. Негаки, салбий қаҳрамонларда ўзига хос характер бор. Характерли ролларни яратиш жараёнида ўзим мазза қиламан. Баъзан романтик хаёллар билан юрадиган 17-18 ёшли қизлар образини ҳам ижро этишимни сўраб қолишади. Бундай ролларни баъзида ижро этганман ҳам. Лекин кўп ҳолларда бундай роллар санъаткорга ҳеч нарса бермайди.

- "Қайтар дунё" сериалидаги Машҳура ролингиз ҳамманинг нафратини келтиради. Ўзингизни-чи?

- Ижро этган ролларимдан ўзим ҳеч қачон нафратланмаганман. "Қайтар дунё" сериалида Машҳурани ижро этаётганимда ҳам ҳамма салбий роллардай, деган фикрда эдим. Бироқ унга овоз бериш жараёнида Машҳурадан ўзим ҳам нафратланганман.

- Олийгоҳнинг биринчи курсданоқ Ўзбек Миллий академик театридан таклиф олгансиз. Бунга нима ёки қандай воқеа сабаб бўлганди?

- Институтнинг биринчи курсида ўқиётган пайтимизда бир кўриниш тайёрлагандик. Театрнинг бош режиссёри ва устозим Валижон Умаров шуни кўрган эканлар. Кенгаш аъзоларига ҳам ижроим маъқул бўлибди. Шу сабаб билан Ўзбек Миллий академик театрига ишга келганман.

- "Туташ тақдирлар" сериали эфирга чиққандан кейин томошабину мутахассислар ўқитувчи Дилдора ролини жуда маҳорат билан ўйнаганингизни эътироф этдилар.

- Аслида бу роль Раъно Зокировага мўлжаллаб ёзилган эди. Лекин тақдир тақазоси билан Дилдорани мен ижро этадиган бўлдим. Негаки, сериални суратга олиш бошланадиган пайтда Раъно опа узоқ сафарга кетадиган бўлиб қолибдилар. Бу ёқда сериални суратга олиш ишлари тўхтаб қолмаслиги керак. Шу боис, "Тез бу ролга актриса топиш керак", дейилгач, сериалнинг иккинчи режиссёри ушбу ролга мени тавсия этибди. У киши билан бир қатор фильмларда бирга ишлаган эдик. У "Бу ролни Шодияга берсак, яхши бўларди. У 18 ёшли қиз, 40 ёшли аёл ролини ҳам бирдай маҳорат билан ўйнай олади", дебди. Режиссёр Замира опа мени кўриб, "Ёш-ку?!" дедилар. Сериалдаги Дилдора 30 ёшдан ошган қиз эди. Мен эса 23 ёшдаман. Шунга қарамай, охири бу ролга менинг номзодим тасдиқланди. Худди шу кезларда бошқа сериалдан ҳам таклиф бор эди. Биттасини танлашим керак эди. Бошқа сериалдаги ролим асосий бўлса-да, менга "Туташ тақдирлар"даги қаҳрамонимнинг характери ёқди. Негаки, Дилдора образи менинг ўша пайтлардаги ички дунёимга яқин эди. Мен ҳам ҳали турмушга чиқмаганман. Дилдоранинг баъзи руҳий кечинмалари менинг ҳам бошимдан ўтган. Қаҳрамоним ҳам худди мен каби институтни битирган ва ёлғиз онаси билан яшайди. Юрагимдаги дард – отам вафот этганларидан кейин онам мени деб турмушга чиқмаганлар. Хуллас, сериал ва менинг ҳаётим қоришиб кетди.

- Дейлик, сизга бир фильмнинг сценарийси тақдим этилди. У ёқмаса, рад жавобини берасизми?

- Бундай вазият бўлган. Ўшанда анча пайтгача режиссёр мендан хафа бўлиб юрган. Лекин очиғи, рад жавобини беришга анча қийналгандим. Дастлаб бирданига "Йўқ", деёлмай, "ўйлаб, кейин жавобини айтаман", деганман. Бир куни уйдан қўнғироқ қилиб, ўз фикримни айтганман. Режиссёр эса буни бошқача тушуниб, "Сен ҳалитдан юлдузлик касалига чалинибсан", деганди. Мен эса "Фильмдаги қаҳрамон нима учун ёмон йўлга кириб кетганлиги очиб берилмаган-ку?" дедим. Шундан кейин у режиссёр билан анча пайтгача кўришмадик. Кейинчалик эшитсам, ўша фильмнинг суратга олиш жараёнида мен айтганимдай ўзгартиришлар киритилибди. Демак, менинг фикрим ҳавога совурилиб кетмабди.

- Сценарийни ўқимасдан туриб, кинода суратга тушишга розилик берган пайтларингиз бўлганми?

- Йўқ, ҳеч қачон. Сценарийни ўқимасдан, ижро этмоқчи бўлган ролим билан яхши танишмай туриб, қатъий фикрга келмайман.

- Ролларингиз ўзингизга манзур бўлмаган дақиқалар ҳам бўладими?

- Кўп бўлган.Очиғини айтайми, бошимни чангаллаб қолган дамларим бўлган. Айрим ижроларимни юзимни яшириб кўрганман. Театрда хатони тузатиш мумкин, аммо кинода кеч қоласан.

- Санъатнинг бошқа йўналишида, айтайлик, қўшиқчиликда ўзингизни синаб кўришга ҳаракат қилмаганмисиз? Кўпчилик сизни ширали овози бор, дейишади.

- Бу гапни менга кўпчилик айтади. Ширали овозим борлигига ўзим ҳам шубҳа қилмайман, негаки, ёшлигимдан қўшиқ хиргойи қилиб келаман, институтда вокал дарсларидан доим "5" баҳо олганман. Бу борада, ҳатто ҳомийлар ҳам ёрдам беришга шайлигини билдиришган. Бироқ ҳар доим "Чумчуқ сўйса ҳам, қассоб сўйсин", мақолига амал қиламан.

- Ўзингиз қайси санъаткорлар қўшиқларини мириқиб тинглайсиз?

- Кумуш Раззоқова, "Ялла" гуруҳи ва Насиба Абдуллаева қўшиқларни мазза қилиб эшитаман.

- Мазмунли суҳбатингиз учун раҳмат! Сиз келгусида кўплаб бир-биридан гўзал, ажойиб роллар ижро этиб, мухлисларингизни хушнуд этасиз, деб умид қиламиз.

Суҳбатни

Феруза ИҚБОЛ тайёрлади.