дунёнинг мўъжизалари

ДУНЁНИНГ ХИЛВАТ ГУШАЛАДАРИ

Курраи заминимиз сир-синоатларга тўла. Инсон яралибдики, дунёни ўрганиш, янгиликлар яратиш ва турли тадқиқот ва изланишлар олиб боришга иштиёқманд инсонлар кўп. Дунё тамаддунида инсоният қадами етмаган, ер юзида ўрганиб чиқилмаган жойлар йўқ, деб ўйлаймиз. Лекин, бундай эмас. Сайёрамизда деярли ўрганилмаган, ўз сирларини яшириб ётган жойлар талайгина.

Тристан-да-Кунья

- Атлантика океани жанубидаги майда ороллар архипелагидаги мўъжазгина орол.

Деярли инсон яшамайдиган ушбу оролга энг яқин қуруқлик ундан 1700 миля узоқликдаги Жанубий Африкадир. Ўзининг жуда кичиклиги ва бутунлай цивилизациядан узулиб қолганига қарамасдан, Тристан-да-Кунья бой тарихга эгадир. Бу оролга биринчи бўлиб Англия ва Франция ўртасидаги урушлар даврида қўлга киритилган, лекин номи бирорта тарихий ҳужжатда қолмаган португалиялик олим келган экан. 1800 йилдан бошлаб оролга англиялик, италиялик ва америкалик олимлар кела бошлашган ва илмий тадқиқот ишларини олиб борганлар. Бугунги кунда орол Англияга тегишли ва унда 271 нафар киши яшайди. Улар асосан, фермерлик билан шуғулланадилар.

ЁлҒиз орол ёҳуд

Кергелен ороли

Бу орол цивилизациядан бутунлай узилган дейилса, асло муболаға бўлмайди. Орол Ҳинд океанининг жанубий ҳудудида жойлашган. У ерга самолёт учмайди, шу сабабли бу оролга боришни хоҳлаган сайёҳлар Мадакаскар ороли яқинидаги Реюньон оролларидан 6 кун давомида кемада сузишларга тўғри келади.

Оролнинг маҳаллий аҳолиси мавжуд эмас, лекин унга Франциядан мунтазам равишда олимлар келиб туради. Ушбу орол 1772 йили кашф этилган бўлиб, бугунги кунда оролда илмий ва тадқиқот станциялари кўп, уларнинг аксарияти Францияга тегишлидир.

Мотуо -

ўрганилмаган ҳудуд

Мазкур ҳудуд Тибет автоном давлатида жойлашган. У Осиёдаги деярли ўрганилмаган оз сонли жойлардан бири бўлиб, ҳозирда Хитойда инсон қадами етмаган ягона жой ҳисобланади. Агар бирор киши Мотуога боришни истаса, Ҳимолайнинг қорли тоғларидан юриши, кейин эса 200 метрлик энсиз осма кўприкдан ўтиши лозим бўлади. Тадқиқотчиларнинг таъкидлашларича, сир-синоатга бой Тибет ўлкасининг муқаддас деб ҳисобланувчи ушбу жойи дунёдаги энг гўзал ва ўзига хос, бетакрор гўшаларидан бири ҳисобланади.

Канаданинг Нунавут ҳудудидаги кичик Алерт қишлоҒи

У Шимолий Муз океани кенгликларида, Шимолий қутбга 500 мил масофада жойлашган. Мазкур қишлоқ энг чекка шимолий аҳоли пункти ҳисобланади. Иқлим шароити жуда оғир бўлгани сабабли, унда инсонлар яшамайди. Фақатгина бир нечта тадқиқот станцияси бор. Дунёнинг энг олис худудларидан бири саналган Алерт қишлоғида ёз давомида кун 24 соат, қишда эса тун 24 соат давом этади.

Англияга тегишли

Питкерн ороли

Бу орол Тинч океанининг жанубий ҳудудида жойлашган кичкинагина қуруқлик ҳисобланади. Унга энг яқин бўлган қуруқлик (700 милдан кўпроқ) Гамбьер ва Таити ороллардир. Ушбу оролда аҳоли зичлиги бўйича 1 кишига бир квадрат километр тўғри келади ва атиги 50 нафарга яқин инсон яшайди. Уларнинг асосий машғулоти фермерлик ва балиқ ови ҳисобланади. Орол вулқонли жой бўлиб, қоялардан иборат қирғоқлари сувдан, денгиздан 350 метргача баланддир. Питкерн оролига самолётда бориб бўлмайди, фақат кемада бориш мумкин.

ойдиной Ваҳобжонова

тайёрлади.