МАТЕМАТИКА ФАНИНИНГ БИЛИМДОНИ

Шаҳло Абдуллаева - 1997 йили Балиқчи туманида туғилган. Айни пайтда тумандаги 12 Давлат ихтисослаштирилган мактаб-интернатининг 9-синфида ўқийди. У тиришқоқлиги, қобилиятли ўқувчи эканлиги, ташкилотчилиги, ташаббускорлиги билан устозлари назарига тушган. Аъло ўқиши, намунали хулқи билан эса барчага ўрнак бўлиб келмоқда. Фанлардан ўтказилган "Билимлар беллашуви" танловида туман ва вилоятда юқори натижаларга эришмоқда.

2008 йилда фан олимпиадаси туман босқичида она тили фанидан 1-ўринни эгаллади. Шу йили математика фанидан ўтказилган "Ўйла, изла, топ" интеллектуал ўйинида ғолибликни қўлга киритган. 2010 йилда "Камолот" Ёшлар ижтимоий ҳаракати томонидан ўтказилган "7х7" ўртоқлик учрашувидаги фаол иштироки учун мукофотланган. 2010-2011 ўқув йилида "Билимлар синови"да вилоят босқичида 2-ўринни, 2012 - йили математика фанидан вилоят босқичида 1-ўринни эгаллади.

Шунингдек, Шаҳло спортнинг "Ўзбек жанг санъати" тури билан ҳам мунтазам шуғулланиб келади. Бу йўналиш бўйича туман, вилоят миқёсида ўтказилган мусобақаларда фахрли ўринларни эгаллаган.

Айниқса, Шаҳло Абдуллаеванинг математика фани билимдони сифатида эришган ютуқлари унинг келажакда етук инсон бўлиб камолга етаётганидан далолат беради.

У келажакда ана шу соҳанинг мутахассиси бўлишига асло шубҳа йўқ. Биз ҳам унинг орзу-ниятлари рўёбга чиқишига тилак билдириб қоламиз.

Зумрадхон АБДУЛЛАЕВА.