Дил номалари

ЎЗ ИШИМДАН МАМНУНМАН

Мен узоқ йиллардан бери мана шу корхонада ишлаб келаман. Шу йиллар мобайнида устозларимдан ўз соҳам бўйича жуда кўп нарсаларни ўргандим. Президентимизнинг соҳамиз бўйича чиқарган қарорлари бўйича иш олиб борган ҳолда кадрлар билан ишлаш ҳамда ҳужжат ишларини пухта ўрганишга ҳаракат қилдим.

Айни кунда жамоамиз аҳил, иноқ. Шу билан бир қаторда тартиб-интизом ҳам бор. Чунки тартиб-интизом бор жойда иш ривож топади, барака бўлади.

Мен ўз ишимга меҳр қўйганлигим боис, ҳар куни идорага ҳуш кайфият билан келаман. Жамоат ишларида ҳам фаол иштирок этаман.

Мен яқинлашиб келаётган улуғ айём - саккизинчи Март аёллар байрами билан юртимиздаги барча хотин-қизларни табриклайман. Уларнинг ишларига ривож, оилаларига тинчлик-хотиржамлик тилайман.

Муҳаббат ҲУДОЙБЕРДИЕВА,

Андижон сув омборидан фойдаланиш бошқармаси кадрлар бўлими бошлиғи.

"ГЎЗАЛЛИККА ИНТИЛИБ ЯШАНГ"

Мустақилликка эришганимиздан сўнг ҳар соҳада бўлгани каби, кичик бизнес ва хусусий тадбиркорликни ривожлантиришга ҳам кенг йўл очилди.

Шунда мен ҳам туманимизда "Гўзаллик салони" очишни ният қилдим. Чунки аёл зоти гўзалликка интилиб яшайди. Аёл кишидан ўзига оро беришда нозик дид, қунт ва эътибор талаб этилади.

Шундай пайтларда хотин-қизларимиз "Гўзаллик салони"га ошиқишади. Опа-сингилларимизга ана шу йўналишда хизмат кўрсатиш мақсадида Олтинкўл тумани марказида "Моҳлар-ойим" гўзаллик салонини ишга туширдик. Бу ерда қизларимизнинг дидига мос келинлик либослари ҳам бор.

Сартарош-косметолог сифатида иш бошлаган Мадинахон Сотволдиева Андижон шаҳрида жойлашган "Забаржад" гўзаллик салонида устозларидан соч турмагидан тортиб, пардоз қилиш усулларини пухта ўрганиб келди.

Мадинага ўхшаган ўз ишининг моҳири бўлган қизларни иш билан таъминладик.

Ёшидан, касбидан қатъи назар аёлларнинг зоҳири ҳам, ботини ҳам гўзал бўлиши керак. Аёлнинг ташқи қиёфасини ораста, латофатли қиладиган нарса, унинг сочлари. Агар бунга қалб гўзаллиги уйғунлашса, у янада жозибали, мафтункор бўлади.

Тилагим, аёлларимиз ҳамиша гўзал бўлсинлар. Уларнинг ҳар бир куни байрамга айлансин.

Гулмира МИРЗАМАТОВА,

тадбиркор, Олтинкўл тумани.