№11, 14.03.2013 ОРАМИЗДАГИ АЁЛЛАР
КАСБИДАН БАХТ ТОПГАН АЁЛ
"Мен ўз хизмат вазифамни пухта бажаришга ҳаракат қиламан,-дейди Андижон шаҳридаги 17-алоқа бўлимининг мудираси, ўз касбининг фидоийси Сайёрахон Умматова. - Кўпинча иш билан бўлиб, куннинг кеч бўлиб қолганлигини ҳам билмай қоламан.
Қаҳрамонимнинг бу иқрори ҳақиқат эканлигига кўп бор гувоҳ бўлганман. Баъзан ишдан кеч қайтаётган маҳалим алоқа бўлимига кирсам, куннинг иссиқ ёки совуқ бўлишига қарамай Сайёрахон доимо ишлаб ўтирган бўлади. "Мудира шу ерда экан, демак бўлимнинг бошқа ходимлари ҳам шу ерда ёхуд хизмат вазифаси юзасидан ўз ҳудудларида бўладилар" деб ўйлайман беихтиёр.
Мудиранинг биз сингари мижозларнинг ҳурматига сазовор бўладиган яна бир жиҳати бор. Ҳузурига турли иш билан кирган одамларнинг бари хурсанд бўлиб чиқади. Ўзининг ширинсуханлиги билан инсонларнинг кўнглини оладиган бу аёл кўп вақтини ишга сарф этиб, ўз оиласини унутиб қўймадимикин, деган фикрга ҳам борганман. Аммо ундай эмас экан. Турмуш ўртоғи Асрорбек билан ибратли оиланинг соҳибу соҳибалари экан.Катта қизлари Дилдорахон турмушга чиққан, кичик қизи Дурдонахон эса ўтган йили коллежни тамомлаган. Уларнинг ҳар иккови ҳамширалик касбини танлаган.
Мен қаҳрамонимни уйда қандай машғулотлар билан шуғулланишига қизиқдим.
- Томорқамиз катта,- дейди мудира. - Ундан унумли фойдаланишга ҳаракат қиламиз, шунингдек, хўжалик учун керак бўладиган савзавотлар экиб, етиштирамиз. Томорқамизнинг катта қисми гуллар билан банд. Мен ишдан бўш пайтларимда қизимни ёнимга олиб, гуллар парвариши билан шуғулланаман.
Биз ўз касбининг фидоийси, тиниб-тинчимас аёл Сайёрахон Умматованинг кейинги ишларида омад, оиласига тинчлик-хотиржамлик тилаймиз.
Абдуманноб АҲМЕДОВ,
Андижон адабиёт ва санъат музейи ходими.
|