ЮЗ БИЛАН ЮЗЛАШГАНЛАР

ТИЛИДАН ШУКРОНАЛИК ТУШМАЙДИГАН МОМО

Балиқчи туманидаги Бўстон қишлоғида истиқомат қилувчи Зайнабхон она Исабоевани ҳамма табаррук момо деб ҳурмат билан тилга олади. Онахон бу йил 104 баҳорни қарши олди.

Юзларидан нур ёғилган момо биз билан ҳам айланиб, ўргилиб кўришар экан, танимаганини яшириб ҳам ўтирмади.

- Сиз ҳақингизда ёзгани келибди, - деди набираларидан бири. Шундан сўнг мени эмас, парваришимни қилаётган мана бу болаларимни ёзинг болам, - деди онахон.

- Энамни ҳар қанча ёзсангиз арзийди, -дейди набира келини. - Бошидан ўтганларини эшитсангиз, тирик тарих дейсиз.

- Ёшлик йилларимиз ғоят қийинчилик даврларга тўғри келган, - дейди Зайнабхон момо чуқур хўрсиниб. - Бунақа фаровон кунлар қаёқда дейсиз? Эртадан кечгача колхозда ишлаб, ғўза парвариш қилиб, ипак қурти боқиб ҳам қўлимиз пул, эгнимиз тузук - қуруқ усти-бош кўрмаган. Тунларни тонгларга улаб, тирикчилик деб қилмаган ишимиз қолмаган. Аммо ҳаётдан , тақдиримиздан нолимасдик. Кўрган кунимизга шукур келтирардик . Турмуш ўртоғим билан 4 нафар фарзандни тарбияладик. Улар ҳам меҳнатнинг ичида катта бўлишди. "Ҳаракат қилсанг , камлик кўрмайсан, бировнинг қўлига қараб қолмайсан", деб қулоғига қуйдик. Оллоҳга шукур, ҳаммалари инсофли, оқибатли, меҳнаткаш бўлиб катта бўлишди. Уйлаб жойладик. Касб-ҳунарли қилдик. Ҳаётда ўз ўрниларини топишди, ўзларидан кўпайишди. Шунисига шукур, болам.

Дилбандлари камолини кўриш бахтидан масрур онахон бардамлиги, хотирасининг тиниқлиги билан бизни ҳайратда қолдирди. Саксондан ортиқ невара, чевара, эвараларининг исмларида ҳам адашмаслигини кўриб ҳавас қилдик. Онахон шу ёшида ҳам уларни ўйлайди, фарзандларининг тинчлиги, хотиржамлиги куч-қувват бахш этади гўё.

- Бугунги дориламон замонни кўриб, яшаган сайин яшагинг келади, - дейди момо. - Юртимиздаги тўкинчилик, ободончиликни кўриб, кўнглинг яйрайди. Қайси томонга қарасанг, баланд-баланд иморатлар ақлингни шоширади. Шундай ҳаётни яратиб бераётган Юртбошимизга раҳмат, болам.

Зайнабхон момонинг тилидан шукроналик тушмайди. Қўли эса дуода. Илоҳим , мана шундай пиру бадавлат кексаларимиз бор бўлсин.

Шаҳзода КАРИМОВА,

Балиқчи тумани.