БИЗ УРУШ КЎРМАДИК, АММО

Ҳар гал ойнаи жаҳонда "Армон" кинофильми намойиш этилганда жанггоҳ ортидаги ҳаёт, ўғилларини, турмуш ўртоқларини урушга юбориб, бутун қийинчилик ва оғир меҳнатни болалари билан енгишга ҳаракат қилган матонатли аёлларни кўриб, уруш халқимиз бошига не-не кунларни солганини ҳис этамиз.

Айниқса, фронтга ёрдам деб, қулоғидаги сирғасини, қўлидаги узугини, эгнидаги қимматбаҳо кийимини, нон-у насибасини, ризқини қўйингки, борини Ғалабага деб аямаган оналаримизни, опаларимизни, бувиларимизни кўз олдимизга келтириб, ўйга толаман.

Ҳа, шундай қийинчилик кунлардаги бундай мурувватни, саховатни кўриб, одамларда инсоф, диёнат, Ватанга муҳаббат туйғуси ҳамма нарсадан юксак турганлигига имон келтирасиз.

Биз уруш кўрмадик, лекин унинг битмас жароҳатларини оталаримизда - улар қўлтиқтаёқ билан юрганларида, оналаримизда - улар урушда дом-дараксиз кетган фарзандининг, турмуш ўртоғининг йўлига термулиб, кўзлари толганларида кўрдик.

... Баҳри момо набираларининг орқасидан нон ушоқларини териб, кўзига суришлари, Қори отанинг эса ахлат уюмига аралашиб ётган нон бурдаларини битталаб териб, уйга ташиганлари бобо ва бувиларимизнинг ҳозирги кунлар қадрини жуда чуқур англашларидан, қаҳатчилик пайтларининг оғир синовларини унута олмасликларидан дарак беради?!

Аёлларнинг кетмон дастасидан қабарган қўлларини кўз олдимга келтириб, кечқурун хира чироқ ёруғида кўсак чувиб ўтириб, ҳаёллари жанггоҳларда қолган қизларнинг бокира туйғуларини ҳис этиб, замонамизга, тинч, хотиржам кунларимизга шукроналар айтаман. Фарзандларимиз бағримизда ўсаётганидан, уларнинг бахти тўкислигидан қувонаман.

... Ҳабибахон ая турмуш ўртоғидан "қора хат" олганида қўлидаги ўғилчаси йўлга юриб қолганди. Ёстиқдошининг ёди ҳаққи-ҳурмати бошқа рўзғор қилмади. Бутун меҳрини ўғлига берди. Ўғли ўзидан кўпайиб, болалари, набиралари билан уйини тўлдирди. Сабру-бардошда беназир, садоқатда бетимсол бу аёл барча ўзбек аёлларининг тимсоли десам, асло муболаға бўлмайди. Ана шундай аёлларни ҳар қанча қадрласак, камлик қилади.

Ҳозирги осойишта кунларимизга етган кексаларимизни асраб-авайлайлик. Чунки улар бор уйимизнинг, ҳаётимизнинг файзи бор. Улар бор юртнинг тинчи бор!

Санъатбек ТУРСУНОВ,

Олтинкўл тумани.