АЁЛЛАР УЧУН ИМКОНИЯТ

Андижон шаҳрининг Боғишамол даҳасида "Марҳабо файз" деб номланган чевархона ишга туширилди. Аёллар либослари, турли пардалар, ёстиқ ва тўшакчалар тикишни йўлга қўйган корхонада ишлаш учун маҳалладаги ёш қизлар жалб этилди. Бугун бу ерда бир гуруҳ чевар опа-сингилларимиз ишлаётган бўлса, яна бир гуруҳ ёш қизлар устоз-шогирд анъанаси асосида ҳунар эгалламоқдалар.

- Корхонани ташкил этишдан мақсадимиз, аҳолига сифатли маҳсулот етказиб бериш, шунингдек, ишсиз аёлларимиз учун даромад топиш имкониятини яратишдир, - дейди тадбиркор Ферузахон Азизова. - Келгусида фаолиятимизни кенгайтириш ҳисобига қўшимча иш ўринлари яратиш, ҳунар ўрганиш истагидаги ёш қизларни жалб этиш режаларимиз бор.

М. ҚОДИРОВА.