"АЁЛ БОРКИ ОЛАМ МУНАВВАР"

Андижон шаҳридаги "Намуна" МФЙ ташаббуси билан Андижон давлат тиббиёт институти қошидаги 1-академик лицейда ана шу мавзуда тадбир бўлиб ўтди. Унда лицейда таҳсил олаётган талаба қизлар, жамоатчилик вакиллари ҳамда бир гуруҳ тиббиёт ходимлари иштирок этишди.

Тадбирда сўзга чиққанлар бугунги кунда хотин-қизларнинг жамиятимизда тутган ўрни, давлатимиз томонидан уларга кўрсатилаётган эътибор хусусида тўхталдилар.

Учрашувда қизларнинг маънавий дунёқарашини кенгайтиришда китоб мутолаасининг аҳамияти, барвақт турмушга чиқишнинг салбий оқибатлари, миллий урф-одатларимизни асраб-авайлаш, қизлар ибоси - ҳаё белгиси эканлиги тилга олинди. Айниқса, қариндош-уруғлар ўртасидаги никоҳнинг аянчли оқибатлари ҳақида ҳаётий мисоллар келтирилиб, мавзуга оид кўргазма намойиш этилди.

Жонли мулоқот тарзида ўтган учрашувда талаба қизлар ўзларини қизиқтирган саволларга атрофлича жавоб олдилар.

Н. САЙДАЛИЕВА.