орамиздаги аёллар

ВЕЛОСИПЕД МИНГАН БУВИ

"Келинлар қўзғолони" бадиий фильмида бир эпизод бор эди: кенжа келин Нигора қайнонаси йўқлигидан фойдаланиб, овсинларини жисмоний тарбия билан шуғуланишга ундайди. Шунда қайнонаси келиб, келинларини бундай ҳолатга кўриб, дакки бериб, уялтиради. ҳозирги қайноналар орасида Фармонбибидан фарқлироқ келинларининг соғлом турмуш тарзига бўлган муносабатини қадрлайдиган, балки ўзлари ҳам соғликларини тиклаш учун югураётган, велосипед минаётган қайноналар талайгина.

- Анча йиллар қон босимимнинг пастлиги, юрагимнинг камқувватлигидан кўп азият чекдим, - дейди Балиқчи тумани, Оққўрғон қишлоғида истиқомат қилувчи Нодирахон опа Имомова. - Шифокорга мурожаат қилсам, даволанишим лозимлигини айтишди. Анча муддат даволандим. Бироқ танадан дори-дармоннинг кучи кетгач, яна ўша ҳолатга тушавердим. Даволовчи врачим энди юракни кучайтириш учун ҳаракатни кўпайтиринг, иложи бўлса, велосипед мининг, - деб маслаҳат берди. ўша пайтда эллик ёшларда эдим. Бу ёшда аёл кишининг велосипед миниши осон эканми? Бироқ болалигимда акамга ҳавас қилиб, велосипед минишга қизиққаним, йиқилиб бўлса ҳам велосипед бошқаришни билиб олганим қўл келди. Врачнинг гапи билан янги велосипед олиб, минишни бошладим.

- Бу 67 ёшни қоралаган Нодира опанинг, гапи. Бироқ опани кўрганлар у кишига қараб бундай улуғ ёшни беришмайди. ўзи ҳам кексаликни тан олгиси йўқ. Мана ўн йилдан ошибдики, Нодира опа қишлоқнинг у бошидан, бу бошигача велосипед бошқариб юрганини кўрасиз. - Велосипед минадиган Нодира опа десангиз, - қишлоқнинг каттаю кичиги яхши билади, - дейди опа кулиб. Спорт кийимида, бошига рўмолини танғиб олган опа бу кўринишда юришдан хижолат чекмайди. "Велосипедни мина бошлаганимдан бери аҳволим анча яхши. ўзимни қушдай енгил ҳис этяпман. Агар бирор сабаб билан шу машғулотни бажармасам, ниманидир йўқотгандай бўламан. Бошида велосипед миниш инсон организми учун фойдали эканлигига унчалик ишонмагандим. Аммо бугун велосипед минмаган кунимни тасаввур қилолмайман.

Дарҳақиқат, спорт билан шуғулланиш пайтида мускуллар фаоллашиб, юрак фаолияти яхшиланади. Велосипед миниш эса нафақат жисмонан тетикликка, балки руҳий ҳолатга ҳам таъсир этади. Шу боис ҳам Нодира опани тушкун ҳолатда юрганини кўрмайсиз.

қолаверса, опа маҳалладошларининг ҳам қувончу ғамгин кунларида елкадош, тиниб-тинчимас, фаоллиги билан ҳам кўпнинг ҳурматига сазовор бўлган. Оиласи, фарзандлари онанинг давлати. Уларга ҳам спортнинг соғликка нечоғли фойдаси борлигини, шуғулланиб туриш лозимлигини уқтириб боради. Маҳалла аёллари уй бекаларини ҳам спортга жалб қилган. ҳозирги кунда Нодира опанинг велосипедни чаққон ва тез бошқаришига, соғлигига ҳавас қилганлар кўп.

Мақоламиз муқаддимасидаги мисолга қайтадиган бўлсак, Нодира опанинг ўзи ҳам қайнона, она. Фақат Фармонбибидай фикрда эмас. Келинлари ва бўлажак насл давомчиларининг соғлом бўлишини истовчи, спортга ошно она. Энг асосийси, ўзининг соғлигига эътиборсиз қарамаётган ва ёшларга ўрнак бўлаётган, соғлом турмуш тарзини ёқлаётган Буви.

Истагимиз, бу каби аёлларимиз сафи янада кўпайсин.

Зумрадхон

АБДУЛЛАЕВА.