ЮЗ БИЛАН ЮЗЛАШГАНЛАР

БУ КУНЛАРГА ЕТГАНЛАР БОР, ЕТМАГАНЛАР БОР…

Доно халқимиз "Қариси бор уйнинг париси бор" деган ҳикматни бежиз бот-бот такрорламайди. Чунки дуогўй кексалари қадрланган юрт ҳеч қачон кам бўлмайди. Нортожихон момо Одиловани ҳам олтинкўлликлар "табаррук момо" дея ҳурмат билан тилга оладилар.

Икки нафар фарзанди, 50 дан ортиқ набираси, чеваралари, 10 дан ортиқ эвараси бор. Момо 104 ёшга кирган бўлса-да, у кишининг хотиралари ҳалиям мустаҳкам эканлиги бошидан кечган унутилмас воқеаларни бирма-бир эслаганларида шундоққина сезилиб турди.

- Оллоҳга минг шукрки, тинч, осойишта замонларни кўриш ҳам насиб этди, - дейди онахон шукроналикни тилдан қўймай. - Қандай даврларни кўрдик, нон тиллодан қиммат эди, қизим. Бир ёғи очарчилик, бир ёғи оти ўчсин-а, уруш бошланган... Энди шулар ҳақида ёшларга айтиб берсам, ишонишмайди. Бундай тўқчилик, тўкинчилик қайда эди? Мен доим маҳалладошларимга тайинлайман: бу кунларга етганлар бор, етмаганлар бор. Ношукрлик қилмай яшанглар дейман. Мустақиллик осмондан келгани йўқ, бундай улуғ бахтга эришиш бизнинг халққа қимматга тушган. Шунинг учун фақат шукрона қилиш керак, болам.

Онахоннинг панду-насиҳатлари невара, чевараларига ёд бўлиб кетган. Шундай бўлса ҳам энажонисининг ёнларидан кетгилари келмайди, мароқ билан эшитишади.

- Ўригидан данаги ширин бўларкан, - дейди момо эварасини эркаларкан. - Тўрт қават кўрпачанинг устида фарзандларим, набираю эвараларимни дуо қилиб ўтирибман. Келиним Юлдузхон кўнглимдаги келин бўлган. Мана ўзи ҳам қайнона. Икки ўғил, беш қизнинг онаси. Ўғлим Фазлиддин билан ҳамма болаларини ўқитиб, олий маълумотли қилиб, қаторга қўшишган. Умридан барака топишсин. Қизим Чўлпоной ҳам ўзидан тинган. Ували-жували бўлиб, фарзандлари, набиралари қуршовида яшаяпти.

Фақат шу дориламон кунларни чоли кўрмаганлигини айтиб, онахоннинг мижжаларида ёш айланади.

- Момо, узоқ умр кўришнинг сири нимада? - дейман нурсиз кўзларига тикилиб.

- Нимада бўларди, болам. Бунинг сири йўқ. Ҳар бир инсон ўтган кунидан рози бўлиши керак. Шукр қилиш лозим. Оиласида қувончли кунлар кўп бўлишига аёл сабабчи. Ўтган умримдан розиман. Фарзандларимга суянаман, улар борлиги давлатим. Шуларнинг орқасидан пиру бадавлат бўлиб, кексайиб юрибман-да.

Нортожи бувининг юзларидан нур ёғилади. Ҳаётда тўкис бахтга эришган, тилларидан шукроналик тушмаган онахонга чин дилдан ҳавас қилдик.

Зумрадхон

АБДУЛЛАЕВА.