ОГОҲЛИК

БИЗНЕС ҚУРБОНИГА АЙЛАНИБ ҚОЛМАНГ

Инсон ҳаётда яхши яшаб, ўзидан эзгу ном қолдиришни истайди. Бунинг учун ҳалолликни ўзига ибрат билиши лозим. Эл-юрт хизматидаги киши ҳамиша эъзозу ҳурматга лойиқ. Шу ўринда таъкидлаш керакки, юртдошларимиз ҳалолу ҳаромнинг фарқига боришлари катта аҳамиятга эга.

Шу ўринда инсоннинг хору зорликда қолдирувчи одам савдоси билан шуғулланаётган кишиларларнинг топаётган бойлиги харом эмасми, деган саволга ҳар ким ҳар хил жавоб берар. Мен эса, нафақат харом балки қабиҳлик билан топилган бойлик деб айтардим. Минг афсуски, ана шундай жирканч йўл орқали пул топаётган кимсалар виждонидан кечса кечадилару, аммо нафс уларни тинч қўймайди.

Шу боис ҳам бугун жаҳоннинг деярли барча мамлакатларида одам савдоси жиноятининг кўлами ортиб бормоқда. Алдов қурбонларининг саноғи ҳам кўпаймоқда. Натижада пул топиш илинжида ўзга юртларга кетаётган юртдошларимизнинг айримлари сарсон бўлмоқда. ҳатто айримлар турли хасталикларга, кўнгилсиз ҳодисаларга учраб, яримжон ҳолда Ватанига қайтмоқдалар. Айримлар эса...

Яқинда бир синфдошимнинг онасини учратиб қолдим. Онаизорнинг дарди дунёни тутгудек. Синфдошим онасининг тилаб олган ёлғиз фарзанди эди. Ўз юртида топаётганига қаноат қилмай, чет давлатга ишга кетган ўғил бир йил ўтмай, тобутда уйга қайтибди. Аввало, Яратганнинг иродаси, аммо у олисдаги мўмай даромадга интилмай, юртимиздаги топганига шукр қилганида, эҳтимол, бугун онаизори ёш тўкмаётган, фарзандлари етимлик тақдирига кўнмаган бўлармиди?!

Азиз юртдошлар, хорижга кетишдан аввал оилангиз, ота-онангиз, соғлиғингиз бебаҳо неъмат эканлигини унутманг. Ўзга юртларда қийин шароитларда ишлаб, ана шу неъматдан ажраб қолманг.

НОДИРАБЕГИМ.