САНЪАТКОР БИЛАН СУҲБАТ

"ТАҚДИРИМДАН МИННАТДОРМАН"

Ўзбекистон халқ артисти Гулчеҳра САЪДУЛЛАЕВАни халқимиз кино ва театрдаги бетакрор роллари ҳамда дубляждаги ўзига хос маҳорати туфайли яхши билишади.

Айниқса, унинг "Ўтган кунлар" фильмидаги Зайнаб образи томошабинлар ёдида муҳрланиб қолган. Шу сабаб бўлса керак, Гулчеҳра Саъдуллаева деган номни эшитишимиз билан кўз олдимизда маъсума ва қалби қон Зайнабнинг сийрати гавдаланаверади. Орадан қанча йиллар ўтган бўлишига қарамай, актриса ҳамон мухлислар эътибори ва ардоғида. Қуйида актриса билан оила, фарзандлар ва санъат мавзусида бўлган суҳбатни сиз азиз муштарийлар эътиборига тақдим этамиз.

- Барча мухлисларингиз сизни санъаткор, бека ва она сифатида билишади. Санаб ўтилган хислатларнинг қайси бирига ўзингиз энг юқори баҳо берган бўлардингиз?

- Мен сиз таъкидлаб ўтган оналик ва бекалик вазифаларимдан кўра актриса сифатидаги фаолиятимга яхшироқ баҳо қўяман. Чунки умримни жисмоний ва маънавий кучимни фақатгина санъатга бағишлаганман. Ҳафталаб, ойлаб оиламиздан узоқда, гастроль сафарларида юрардик. Кино, театр ҳамда телевидение учун кечаю кундуз тинмай меҳнат қилганим боис, оилам ва фарзандларимга камроқ вақт сарфлашимга тўғри келган.

- Ўтган йиллар давомида оилани иккинчи даражага қўйганингиздан афсусланасизми?

- Йўқ, афсусланмайман. Чунки қилган меҳнатларим, фидо-йиликларим бесамар кетмади. Халигача мени севадиган, мени фильмлар ва телевидение орқали кутадиган мухлисларим бор. Мен билан биргаликда санъатга кириб келган кўплаб ижодкорлар ҳозир халқнинг ёдидан кўтарилиб кетган. Хизмат юзасидан учрашувларга, концертларга бориб қолсак, мени ҳам, Лутфулла акани ҳам мухлисларимиз қувонч билан қарши олишади. Демак, меҳнатларимиз самараси ўлароқ, халқ бизни ардоқлайди.

Томошабинга, оммага севимли бўлиб танилиш осон эмас. Бу ҳамма санъаткорга ҳам насиб этавермайди. Мен эса халққа севилиб танилганимдан бахтиёрман. Фидойилик, заҳматкашлик меваси бундан ортиқ бўлмаса керак.

- Кўп вақтингизни санъатга ажратганингиз оилага, айниқса,фарзандлар тарбиясига ўз таъсирини ўтказмадими?

- Мен бу саволга бемалол "йўқ" деб жавоб бера оламан. Чунки, болаларимнинг тарбияси ёмон бўлмади. Гарчи мен умримнинг кўп қисмини санъатга бағишлаган бўлсам-да, болаларим инсофли, диёнатли ва, албатта, ўқимишли бўлиб вояга етишди.

Худога шукур, ўғил уйлантириб келин олганман, қиз узатиб куёвлик бўлганман. Қатор-қатор набираларим ва чевараларим бор. Фарзандларимга бера олмаган меҳрим ва тарбиямни шу жажжи болаларимга беришга ҳаракат қиляпман. Аммо бари-бир санъатни ташлаб қўйганим йўқ. Ҳали ҳам дубляж, ҳали ҳам ижодий учрашувларда фаол иштирок этмоқдаман. Чунки бугун ҳам мухлисларим ва мени севувчи томошабинлар бор. Бугун санъатдаги босиб ўтган йўлимдан афсусланмайман. Аксинча, ундан фахрланаман.

- Фарзандларингиз қа-чондир санъатни оиладан устун қўйганингизни юзингизга солишганми?

- Мен ҳам шундан қўрқардим. Аммо ундай бўлмади. Аксинча, яқинда ўғлимнинг айтган гаплари кўнглимни тоғдай кўтарди. У давлатнинг нуфузли ташкилотларидан бирида ишлайди. Унинг телевизор кўриш ёки радио эшитишга умуман вақти йўқ. Лекин шунга қарамай, "Парвоз завқи" кўрсатувининг мен иштирок этган сонини кўришга вақт топибди. Уйга келгач эса: "Онажон, сизнинг "Мен болаларимга меҳр бера олмаганман", деган гапингизни эшитиб, жуда ғалати бўлиб кетдим. Нега унақа деб ўзингизни камситасиз? Ахир бу дунёда сиздан меҳрибон, сиздан ширин сўз она бормикин? Асло бундай фикрлар билан ўзингизни қийнаманг", деди. Унинг бу гапи юрагимга таскин бўлди. Шу икки оғиз гапдан қанчалар қувонганимни билсангиз эди.

Катта фарзандларимга кўп вақт ажрата олмаган бўлсам-да, кенжа фарзандим, ёшим анча ўтганида дунёга келтирган қизим Муқаддасхонга етарлича меҳр берганман. Муқаддасхон гарчи психология соҳасида таҳсил олган бўлса-да, айни дамда ўзини санъатда синаб кўрмоқда. Дастлаб клипларда суратга тушган бўлса, мана, бугунга келиб секин-аста киноларда ҳам роллар ўйнай бошлади. Унинг бу қадамидан санъаткор сифатида, ҳам она сифатида ҳам ғоят хурсандман.

- Сизга кўплаб санъаткорлар ҳавас билан қарашади. Чунки аёл бошингиз билан санъатда олдинги сафда бордингиз, фарзанд- ларни комил инсон қилиб тарбияладингиз. Бу сиз учун қийин бўлмадими?

- Албатта қийин бўлган. Мен қачонки болаларим оёққа туриб, ўзларини эплайдиган бўлганларидагина санъатга бутунлай шўнғиганман.. Устига-устак институтда ўқиб юрган кезларим, 18 ёшимда турмушга чиққанман. Дастлаб бир тарафда ўқиш, бир тарафда келинлик вазифалари ва бир тарафда санъат турарди. Мен эса уларнинг ҳаммасини бирдан уддалашга интилганман. Лекин бирин-кетин болаларим туғилгач, чарчаб қола бошладим. Айниқса, ўқишни битириш арафасида, давлат имтиҳонлари пайтида жуда ёмон қийналганман. Тасаввур қилинг, қўлимда ҳали чилласи чиқмаган ўғлим, ёнимда эса 1,5 ёшли қизчам. Бир тарафда имтиҳон. Бир куни Лутфулла акага: "Мен бунақада синиб қоламан, жуда қийналиб кетдим. Ундан кўра санъатни ташлайман. Яхши келин, яхши рафиқа ва яхши она бўлиб уйда ўтираман", деб йиғлаганман. Шунда улар: "Агар сиз ўртамиёна актриса бўлганингизда мен ўзим сизни уйда ўтиришга ундардим. Аммо сизнинг иқтидорингиз бор. Сиз ҳали кўплаб бош қаҳрамонлар ролини ўйнашингиз керак. Агар сизни санъатдан четлатсам, бир умр ўзимни кечира олмайман", деганлар. Уларнинг шу гапи менга далда бўлган. Ўзимга ишончимни орттириб, кучимга-куч қўшган. Албатта, турмуш ўртоғим ва қайнонам менга бола тарбиясида катта ёрдам беришди. Уларнинг кўмагисиз мен бу даражага эришолмасдим.

- Гулчеҳра опа, тақдирингиздан миннатдормисиз?

- Албатта, миннатдорман. Ахир менинг ҳаётим кўпчилик ҳавас қилса арзигулик ўтмоқда. Тўғри, ҳамма оилада бўлгани каби менинг оиламда ҳам турли келишмовчилик ва рўзғор ташвишлари бор. Лекин буларнинг барчаси ширин ташвишлар-ку. Мен ўтган умрим, яшаётган бугуним ва келаётган эртанги кунимни ҳам ана шу ширин ташвишлари билан бирга севаман. Тақдир менга Лутфулла акадек, тўғрисўз, ҳалол ва меҳрибон жуфтни насиб айлади. Бир-биридан ширин фарзандларнинг онасига айландим. Санъатда халқнинг муҳаббати ва эътиборига сазовор бўлдим. Агар тақдиримдан, қисматимдан нолисам, гуноҳ эмасми? Умуман, ҳар бир инсоннинг ҳаётида яхши-ёмон кунлар бўлади. Фақат инсон уларнинг барчасини яхшиликка хизмат қилдира олсагина, ҳаёти гўзал ва чароғон кечади.

- Газетамиз муштарийларига, мухлисларингизга тилакларингиз!

- Газета муштарийларига, мухлисларимга бир гапни айтишни лозим топаман. Дўстларим, азизларим, ҳаёт аччиқ-чучуги, яхши-ёмон кунлари билан гўзал. Шундай экан, келинг, умримизнинг қаро кунларини қисқартириб, ёруғ кунлари кўп бўлиши учун ҳаракат қилайлик. Ахир айтишади-ку: "Тақдирни қўл билан яратур одам, ғойибдан келажак бахт бир афсона", деб. Демак, ҳар ким қилаётган амали, орзулари, нияти билан ўз қисматини ўзгартира олади. Шунинг учун ҳам ҳар доим бир-биримизга меҳрибон бўлайлик, яхшилик кўрсатайлик ва яхши ниятлар қилайлик. Яна барча-барчани юртимиз мустақиллигининг қутлуғ 22 йиллик байрами билан табриклайман. Бизга кенг имкониятлар яратиб берган улуғ неъмат - истиқлолнинг қадрига етайлик. Уни ҳамиша асраб-авайлайлик.

- Мазмунли суҳбатингиз учун ташаккур.

Суҳбатдош:

Феруза ИҚБОЛ.