МУЛОҲАЗА

МИЛЛИЙЛИККА НИМА ЕТСИН?...

Шаҳримиздаги "Бахт уйи" биноси ёнидан ўтиб борар эканман, йўлда кетаётган одамлар у ердан чиқиб келаётган ёш келин-куёвга ҳавас билан қараб, уларга гўзал ниятлар билдиришди. Мен ҳам бошқа келин-куёвлардан ўзининг миллий кийимлари билан ажралиб турган, янги оилага бахт тиладим. Шу пайт ортимдан келаётган икки аёлнинг суҳбати қулоғимга чалинди:

- Қаранг, ёш келин-куёв узукка кўз қўйгандек, бир-бирига ярашибдики, ҳавасингиз келади.

- Ҳа, келинни айтмайсизми? Унинг эгнидаги либоси ўзимизнинг миллий атласдан экан, уни бир кўришда ҳақиқий ўзбек қизи эканлиги сезилиб турибди. Барибир ўзимизнинг миллий либослар бошқачада, кўзингни қувнатади.

- Аслида европача очиқ-сочиқ кийимлардан минг марта афзал. Тикилган атлас либосларни кейинчалик ҳам кийиш мумкин. Яна битта афзаллик томони европача қиммат кўйлакнинг пулига ўзимизнинг миллий либосларимиздан бир нечтасини сотиб олиш мумкин.

- Лекин ёшлар бир кунлик тўй учун ота-онасини ҳам ташвишга қўйиб, ўша ғарбдан кириб келган оқ либосни "кияман", дея туриб олишади-да.

Ана шу аёллар мулоқоти оддий бўлиб туюлса-да, бироқ улар айтган гапларининг замирида ҳақиқат бор. Наҳотки, қизлар ҳаддан ташқари очиқ, калта, тор кийинишлари бошқаларга ёқмаслигини сезишмаса?

Мен йигитлар номидан шуни айтмоқчиманки, қизларжон ўзимизнинг миллий либослар сизларга жуда ярашади. Бошда дўппи, узун сочи ўрилган, ҳаё ва иффатга ўранган қизга ҳеч ким ёмон назар билан қарамайди. Аксинча, унга ҳавас билан қарашади.

Азиз опа-сингиллар ўзлигингизни асло унутманг. Ахир ўзлигини, ҳаё-ибосини йўқотган қиз, ҳеч қачон опа-сингил, севимли ёр, жуфту-ҳалол, деган номга асло муносиб бўла олмайди.

Сизлар миллатимиз давомчилари, муқаддас зотсиз.

Умид РАСУЛ.