МУРОЖААТНОМАДАН РУҲЛАНИБ...

ДАЛДА БЕРГАНИ ДАЛАГА

"Фарзандларимиз камоли учун белни маҳкам боғлайлик" чақириғи билан чиққан вилоятимиз фаол аёлларининг мурожаатномаси асакалик ёши улуғ онахонларни ҳам далага чорлади.

- Маҳалламиз аёллари ниҳоятда аҳилмиз, - дейди Эъзозхон ҳожи она Мадаминова. - Маҳалламизда қийналган оила борми, якка-ёлғиз кексалар борми, дарров уюшиб уларга ёрдам берамиз. Газетада мурожаатномани ўқиб, ундан руҳланиб, биз 15-20 нафар "Янгисор " маҳалласининг фахрий аёллари ҳамда уй бекалари ҳам далага чиқдик. Айни пайтда Асака туманидаги "Фозилжон орзуси" фермер хўжалиги далаларида пахта териб, юртимиз хирмонига оз бўлса-да, ўз ҳиссамизни қўшяпмиз.

Одинахон ая Ҳакимова, Ибодатхон она Ортиқова, Зулфияхон опа Юсупова ҳамда Ҳабибахон ая Жўраева сингари 65 ёшгача бўлган онахонлар кунига 20-25 килограммдан пахта териб, фидоийлик кўрсатишмоқда.

- Онахонларимизнинг ташаббус кўрсатиб далага чиқиши , хирмонимизга барака киритиши, уларнинг дуолари биз фермерларга катта рағбат, куч бермоқда, - дейди фермер Ойбек Ибрагимов. - Белига этак боғлаган бу онахонларнинг ғайрати барча ҳашарчилар ва теримчиларимизнинг кучига - куч қўшмоқда.

Ҳа, деган туяга мадор, -дейди халқимиз. Онахонларимиз ҳиммати билан хирмонларимиз юксалаверсин.

ЗУМРАДХОН