ОҚҚАН ДАРЁ ОҚАВЕРАДИ...

Асака тумани аҳолиси қадимдан деҳқончилик қилиб, она-заминдан ҳалол ризқ ундириб, эл-юртга насиба улашиб келади. Айниқса, истиқлол йилларида бу борадаги ишлар янада юксалди. Деҳқончилик баробарида ўзига хос тажриба мактаби шаклланди.

"Ер билан тиллашган кам бўлмайди,"- дейди ана шундай яратувчанлик ишқи билан яшаётган "Фозилжон орзуси" фермер хўжалиги раҳбари Ойбек Ибрагимов.

Дарҳақиқат, болалигиданоқ деҳқончиликка меҳр қўйган, она ернинг тафтини туйган Ойбек Ибрагимов 1978 йилда ўрта мактабни тамомлаб, ўша йилнинг ўзидаёқ Андижон пахтачилик институтига ўқишга кирди. Ўқиш жараёнида устозларидан деҳқончилик назариясини, бу шарафли касбнинг сир-асрорларини қунт билан ўрганди. Ўқиб ўрганганларидан шундай хулосага келдики, ерга уруғ сочганда, униб чиққан майсаларга ишлов берганда, экинни суғорганда, умуман, ҳар бир жараённи меҳр билан бажарсангиз, она замин ҳам сиздан ўз саҳоватини аямас экан.

Аслида Ойбекнинг катта бобоси - Хорунбой ота ҳам кўп йиллар жамоа хўжалигига раислик қилган. Болаларини ҳалол меҳнатга ўргатган. Кейин отаси Фозилжон ота шу ерларнинг эгаси бўлди. Узоқ йиллар хўжаликка раислик қилди. Ойбекнинг болалиги ҳам шу далаларда кечди. Мактабда ўқиб юргандаёқ трактор миниб, ғўза қатор ораларига ишлов беришнинг ҳадисини олди.

- 2006 йилда тендерда қатнашиб, 60 гектар ерни ютиб олдим, - дейди фермер. - Шундан сўнг "Фозилжон орзуси" фермер хўжалигини ташкил этдик. Кўпни кўрган, катта ҳаётий тажрибага эга инсонларнинг маслаҳатларига амал қилиб, иш олиб бордик. 2008-2009 йилларда учта фермер хўжалиги бирлашиб, ер майдонимиз кенгайди.

Ўтган салкам етти йил ичида эса мақташга арзигулик ютуқлар қўлга киритилди. Ва бугун Ойбек раҳбарлик қилаётган фермер хўжалиги вилоятда энг илғорлардан бири сифатида эътироф этилмоқда. Ўз навбатида олинаётган даромад ҳам йилдан-йилга ортиб бормоқда. Бугунги кунда хўжаликда эллик олти нафар аъзо меҳнат қилади. Аҳил бир оилага айланган ишчилар 117 гектар ерда деҳқончилик қилиб, эл-юрт дастурхонининг тўкин бўлишига ўзларининг муносиб улушларини қўшиб келишмоқда. Хўжалик аъзолари 30 гектар ерга пахта, 74 гектар ерга ғалла, 4 гектар ерда тут плантацияси, қолган ерларда эса полиз ва сабзавотлар етиштиришади.

Ишбилармон фермер ўтган йиллар давомида барча йўналишлар бўйича шартнома режаларини ортиғи билан бажариб, яхшигина фойда кўрди. Кўрилган даромади ҳисобидан иш самарадорлигини ошириш учун 1 та ҳайдов, 3 та чопиқ трактори, 2 та прицеп ҳамда омочлар сотиб олинди. Бунинг самараси ўлароқ деҳқонлар экинларга ўз вақтида ишлов беришади. Хатто, бошқа фермер хўжаликларига ҳам техникадан ёрдам бериб туради. Шунингдек, даромадлари эвазига замонавий услубда қурилган муҳташам дала шийпони ҳам кўрган кишининг кўзини қувнатади.

2012 йилга келиб фермер хўжалиги ғалла, мева ва сабзавотчиликка ихтисослашди. Президентимизнинг фермер хўжаликларини кўп тармоқли хўжаликка айлантириш ҳақидаги тавсияларидан руҳланган холда асаларичилик ҳам ташкил этилди.

Қаҳрамонимиз қилган ишлари ҳақида гапирар экан, "мени кўпам мақтаманг, асосий суянганларим иш бошқарувчи Рўзибой Болтабоев, сувчилар Топиболди ака Мўминов, Ибодилло Акбаров, Салимжон Эрматов, механизатор Равшанбек Каримов, Шаробиддин Матхолиқов, Иқболжон Эгамбердиевлар ҳақида ёзинг. Ана шулар бугунги кун фидойилари", дейди.

Деҳқончилик ишларини изчил йўлга тушириб олган фермер энди янада каттароқ ишларга қўл урмоқда. Яъни, интенсив боғ яратиш учун саъй-ҳаракатларни бошлаб юборди. Хориждан олма кўчатлари олиб келиш учун ҳамкорлар билан шартнома имзолаган. Узум боғ қилиш учун эса жойлар ҳозирланган. Ўзларидан чиққан меваларни қуритиб қадоқлайдиган замонавий технологиялар олиб келиш, мини цех ташкил қилишни ҳам режалаштирмоқда. Шунингдек, 400 тонналик музлаткич қуриш нияти ҳам бор.

Ҳа, насиб этса Ойбек Ибрагимовнинг саъй-ҳаракати туфайли яна 30-40 нафар асакалик ёшлар муқим иш ўрнига эга бўлишади.

- Отамнинг бир гапи ҳеч ёдимдан чиқмайди, - дейди фермер: - "Одамларга раҳбар бўлиб ишласанг, қўл остингдагиларнинг қорнини аввал тўйғаз, кейин улар сенинг қорнингни тўйғизади", -деб айтганди. Ҳали ҳамон шу сўзларига амал қиламан. Чунки одамлар манфаат кўрмаса, ишламайди.

Асака туманида Ойбек Ибрагимов каби ўз ишининг устаси бўлган тадбиркор инсонлар жуда кўп. Биз бир фермер мисолида қишлоқ хўжалиги соҳасида амалга оширилаётган илғор ишлар, қишлоқ жойларга саноатнинг кириб келаётгани, шунинг баробарида янги иш ўринлари яратилаётгани, қишлоқларимиз чирой очиб, халқимиз фаровон яшаётганининг гувоҳи бўламиз. Бу албатта, истиқлол берган неъмат, кенг имкониятлар маҳсулидир. Бугун ҳар биримиз ана шу неъматга, имкониятларга шукрона қилишимиз, бор билим ва имкониятимизни шу юрт равнақи учун сарфламоғимиз лозим.

ЗУМРАДХОН АБДУЛЛАЕВА ТАЙЁРЛАДИ.