ТИЛАК

ЕР ЭГАСИ ҲАҚИҚИЙ ДЕҲҚОН БЎЛСИН

Ернинг эгаси ҳақиқий деҳқон бўлсагина ундан мўл ҳосил олинади, юртда тўкинлик бўлади. Буни яхши билган юртбошимиз мустақиллигимизнинг дастлабки йиллариданоқ қишлоқ хўжалигини ривожлантиришга, ўша давр учун мутлақо янги тизим - фермерлик ҳаракатининг шаклланишига бош-қош бўлди. Ушбу тизим қисқа муддатда ўзини оқлади, мамлакатимиз ғалла мустақиллигига эришди.

Юртбошимизнинг ташаббуси билан фермерлик ҳаракати йилдан-йилга ривожланиб борди. Болалигимиздан далада меҳнат қилиб, озми-кўпми деҳқончиликнинг ҳадисини олганлигимиз учун яқинларимиз билан кенгашиб, 1997 йилда "Омад-97" деб номланган фермер хўжалигини ташкил этдик. Ўша йили 46 гектар майдонда деҳқончилик қилиб, юқори натижаларга эришдик.

Айни кунда эса 130 гектар майдонда деҳқончилик қиляпмиз, 60 нафардан зиёд аъзоларимиз бор. Биргина жорий йилда пахтадан 40 центнер, ғалладан 80 центнер ҳосил кўтардик, белгиланган шартнома режаларни ортиғи билан адо этдик. Шунга яраша даромад олдик. Бундан нафақат менинг, балки хўжалик аъзоларининг ҳам манфаатдорлиги ортмоқда.

Икки йил аввал юртбошимиз Андижонга ташриф буюрганларида у киши билан бўлган суҳбати ҳеч ёдимдан кўтарилмайди. У кишининг фермерлик ҳаракатини кенгайтиришга эътибори, берган маслаҳат ва тавсиялари хали ҳамон мени катта масъулият ва шижоат билан ишлашга ундайди.

Ер элни боқади, юқорида айтганимдек, ернинг эгаси деҳқон бўлсагина, юртда тўкинлик бўлади. Шу маънода вилоятимиздаги барча фермерларни ернинг ҳақиқий эгаси бўлиб ишлашларини истар эдим.

Янги йил остонасида барча фермерларни, муҳтарама опа-сингилларимизни байрам билан муборакбод этаман. Юртимизда "Соғлом бола йили" деб номланган янги йил барчаларимизга бахт ва омад келтирсин.

Омадхон ҲОМИДОВА,

Андижон туманидаги

"Омад-97" фермер хўжалиги раҳбари, Ўзбекистонда хизмат кўрсатган пахтакор.