ҚАТРА

Кўнгил

Кўнгил... У ҳудди сара гулга ўхшайди. Гулга очилиб туриш учун сув керак бўлса, кўнгилга меҳр керак, ўзга кўнгилларга меҳр улашиш учун ҳам керак. Сув ойнага ўхшайди, унда ўз аксингизни кўрасиз. Ҳатто тонгда қуёш, тунда ой ва юлдузларнинг акси бор унда.

Кўнгил инсоннинг барча кечинмаларини ўзида акс эттиради. Шунинг учун сувни кўнгилга қиёс қилишади.

Кўнгил, уни таърифлашга сўз ожиз. У ҳаётнинг аччиқ синовларига тоғдек бардош бера оладиган инсонни йиғлатишга, кулдиришга қодир. "Қадримга йиғлайман", - дейди одамлар.

Қадрга ҳам ўлчовдир кўнгил. Қадр кўрмаган кўнгил озурда. Яна "кўнгил кўйига кирма", деб ҳам қўйишади.

Булоқ сувидек пок, гулдек хокисор кўнгил ёвузлик билан чиқишолмайди. У ўзгаларга бахт, қувонч, меҳр беришга қодир. Кўнгилни кенг қилинг, фақат яхши умид билан тўлдиринг. Шунда кўнглингиз хотиржам, яхши ниятлар йўлдошингиз бўлади.

Феруза ҲОЖИМАТОВА,

Булоқбоши тумани.