ЎЗБЕКИСТОННИНГ ЯНГИ АВТОМОБИЛИ

"CHEVROLET ORLANDO" - ОИЛАВИЙ МАШИНА

"GM Uzbekistan" компанияси- "Chevrolet Orlando" деб номланган оилавий янги автомобиль ишлаб чиқаришни йўлга қўйди. Ўрта ўлчамдаги 7 ўринли янги автомобиль "Chevrolet Cruze" русумида седан платформаси асосида яратилди. Хоразмда ишлаб чиқарилаётган ушбу ихчам автомобиль ўзига хос ажойиб дизайни билан ажралиб туради. Автомобиль 141 от кучига эга, 100 километрга ўртача 7,9 литр ёнилғи сарфлайдиган тежамкор двигатель ва олти поғонали автоматик трансмиссия билан жиҳозланган.

Асосан, оилавий машина деб эътироф этилаётган "Chevrolet Orlando" шинамлиги, салонининг кенглиги ва юк ташиш имкони мавжудлиги билан ҳам эътиборлидир. Буюмларни қўйишга мўлжалланган махсус жойнинг кўплиги ҳайдовчи ва йўловчилар учун қўшимча қулайлик яратади. Приборлар панели эса кўплаб вазифаларни бажара олади.

Автомобиль олд ва ён томондан хавфсизлик ёстиқчалари, бошқарув рулининг паст-баланд-лигига қараб тормознинг ўз-ўзидан блокировкага тушиб қолишига қарши тизим, орқа томонни кўриш учун ён кўзгулар, олд ўриндиқларни тўрт томонга ҳам мослайдиган функциялар билан таъминланган. Шунингдек, ёмғир датчиги, ҳарорат, тезликни ҳайдовчи иштирокисиз назорат қилиш қурилмалари ва бошқа қулайликларга эга.

"General Motors"нинг энг сўнгги ютуқларини ўзида мужассам этган замонавий "Chevrolet Orlando" ўзининг ажойиб дизайни ва хавфсизлик тизими, юксак техник хусусиятлари билан кўпчиликка манзур бўлади.

СОЖИДА тайёрлади.