ИШЛАБ ЧИҚАРИШ ИЛҒОРЛАРИ

АЁЛЛАР МЕҲНАТИ ЭЪЗОЗДА

Мустақиллик йилларида юртимизда жисмоний тарбия ва спортни оммалаштириш, болалар спортини ривожлантириш, соғлом турмуш тарзини тарғиб этиш масалаларига катта эътибор қаратилмоқда. Яратилган шарт-шароитлар туфайли ёшларимиз ўз иқтидорларини тўлақонли намоён этиб, спорт турлари бўйича жаҳон ареналарида юқори марраларни эгаллаб келмоқдалар. Бунда вилоятимиздаги спорт моллари ишлаб чиқарувчи корхоналарнинг ҳам алоҳида ўрни бор.

Балиқчи туманидаги "Хўжаобод" МЧЖ спорт буюмлари ва маҳсулотлари ишлаб чиқаришга ихтисослаштирилган корхонадир. Бу ерда асосан футбол, баскетбол, волейбол тўплари, татами, курашчилар кўрпаси, бокс қопи ва қўлқоплари каби турли спорт жиҳозлари ишлаб чиқарилмоқда. Маҳсулотлар буюртма асосида Ўзбекистон Болалар спортини ривожлантириш жамғармасига, республикамиздаги спорт моллари савдо мажмуаларига етказиб берилмоқда.

- Корхонамизда - "устоз-шогирд" анъанаси яхши йўлга қўйилган, - дейди корхона ишчиси Дилфузахон Обидова. - Жамоамиз жуда ҳам иноқ. Барча бир ёқадан бош чиқариб, ўз вазифаларига масъулият билан ёндошиб, сидқидилдан меҳнат қилади. Ишлаб чиқаришда, жамоат ишларида ўрнак кўрсатган ишчиларнинг меҳнати раҳбарият томонидан муносиб тақдирланади. Мен ҳам ушбу корхонада бир неча йилдан буён фаолият кўрсатаман. Самарали меҳнатларим учун 2012 йилда "Шуҳрат" медали билан тақдирландим.

Корхона ишчиларидан О. Маматова, М. Аҳмедовалар ҳам "Шуҳрат" медали билан тақдирланишган. Улар ўзларининг самарали меҳнатлари билан ҳамкасбларига намуна бўлиб келмоқда. Қолаверса, коллежларни тамомлаб, янги иш бошлаган ёшларга соҳанинг сир-асрорларини ўргатиб, устозлик қилмоқдалар.

Ўзбекистон болалар спортини ривожлантириш жамғармаси Ҳомийлик кенгашининг навбатдаги йиғилишида мамлакатимизда ишлаб чиқарилаётган спорт анжомларининг турларини кенгайтириш ва сифатини яхшилаш, маҳаллий ишлаб чиқарувчиларни ҳар томонлама қўллаб-қувватлашга алоҳида эътибор қаратиш зарурлиги таъкидланди.

Ана шундан келиб чиқиб, корхона жамоаси ҳам ўз олдига бир қатор вазифаларни қўйиб, уларнинг ижросини таъминлашга қаратилган ишларни изчил олиб бормоқда. Бу эса юртимизда спортнинг янада ривожланиши, болаларимизнинг соғлом ва баркамол бўлиб етишишларида муҳим омил саналади.

Муҳаммаджон КАРИМОВ,

Балиқчи тумани.