ИНГЛИЗ ТИЛИ БИЛИМДОНЛАРИ БЕЛЛАШУВИ

Андижон шаҳридаги ҳарбий горнизонда ҳарбий хизматчилар фарзандлари ўртасида "Мен инглиз тилини ўрганаман" мавзусида беллашув бўлиб ўтди. Унда Андижон шаҳридаги 2-умумтаълим мактаби ҳамда 34-ДИМИда таҳсил олаётган ўқувчилар иштирок этиб, ўзларининг билимларини намойиш этдилар.

Беллашуда қатор номинациялар бўйича Илёсбек Абдулхаев, Сохиб Сафаров, Сабина Хайруллаева ҳамда Азамат Одиловлар ғолиб деб топилдилар.

- Ушбу тадбир фарзандларимизнинг нафақат чет тилини ўрганишларини қўллаб-қувватлаш, балки уларнинг фаоллигини, билим олишга бўлган интилишини, қолаверса, қалбларида Ватанга муҳаббат туйғуларини мустаҳкамлашни ўз олдига асосий мақсад қилган, - дейди горнизон командири ўринбосари Йўлдошбой Ҳолиқов.

Якунда ғолиб ва совриндорлар ҳарбий горнизон қўмондонлиги томонидан муносиб тақдирландилар.

Шунингдек, гарнизонда Халқаро оила кунига бағишланиб "Биз ҳамжиҳат оиламиз" мавзусида тадбир ҳам бўлиб ўтди. Ҳарбий хизматчиларнинг оила аъзолари ва фарзандлари иштирок этган ушбу тадбир йиғилганларга хушнудлик бахш этди.

Замирахон ХАҚБЕРДИЕВА.