ХОТИН-ҚИЗЛАРГА КЕНГ ИМКОНИЯТЛАР

Мен узоқ йиллар маҳалла маслаҳатчиси бўлиб ишлаганман, мана бир неча йилдирки, маҳалла фуқаролар йиғини раиси сифатида фаолият кўрсатяпман. Маҳалла билан боғлиқ фаолиятимдан келиб чиқиб айтишим мумкинки, Президентимизнинг "Ўзбекистон Хотин-қизлар қўмитаси фаолиятини қўллаб-қувватлаш борасидаги қўшимча чора-тадбирлар тўғрисида"ги фармони хотин-қизларнинг фаолиятини қўллаб-қувватлаш аёлларга, оила ва маҳаллага қаратилган эътиборнинг бир намунасидир.

Айни кунда маҳалламизда 3920 нафар киши истиқомат қилади, аҳолимизнинг 52 фоизини хотин-қизлар ташкил этади. Ҳудудимизда фармон ижросини таъминлаш борасида эътиборга молик ишлар олиб борилмоқда. Айниқса, аҳоли бандлигини таъминлашда асосан оилавий бизнесни йўлга қўйиш, томорқадан унумли фойдаланишни ташкил этишга алоҳида эътибор қаратилмоқда. Ҳозирда 8 та хонадонда иссиқхона ташкил этилган, қатор оилалар кўрпа-тўшак тайёрлаш, қорамолчилик, паррандачилик, бошқа бир оилалар эса, ўз хонадонларида пленка остига турли кўкат ва зираворлар экиб, даромад топишни йўлга қўйган.

Яқинда маҳалламиз ҳудудидаги бўш турган бинода тадбиркор Зулфияхон Шокирова ташаббуси билан қандолат ва ярим тайёр маҳсулотлар ишлаб чиқарувчи цех ишга туширилди. Натижада бир қанча аёл доимий иш ўрнига эга бўлди.

Бу каби ишларни ташкил этишда маслаҳатчи Юлдузхон Мамасолиева, отинойи Хувайдо Ашраматова, фаоллардан Хадичахон Ғофуровалар хизматларини алоҳида эътироф этишимиз керак. Бир сўз билан айтганда, юртбошимизнинг юқоридаги фармони хотин-қизларга кенг имкониятлар яратиб бермоқда. Ана шу имкониятлар ва эътибор бизга куч-ғайрат беради, фидойилик билан меҳнат қилишга ундайди.

Арофатхон ҚУРБОНОВА,

Марҳамат туманидаги Эрши МФЙ раиси.