№21, 22.05.2014 СПОРТ - САЛОМАТЛИК ДЕМАКДИР
"Спорт - саломатлик гарови" деб бежиз айтишмас экан. Ўзим бунинг гувоҳи бўлганман. Болалигимда бироз нозик бўлганим сабаб касалга чидамсиз ва тез бетобланадиган, эдим. Акам спортнинг футбол тури билан шуғулланарди. Унга ҳавас қилиб мен ҳам спортга қизиқдим.
6-синфда ўқиётган пайтимда мактабимиздаги қўл тўпи тўгарагига қатнай бошладим. Спорт билан мунтазам шуғулланиб, ўзимни аввалгидан кўра тетик, бардам ва соғлом ҳис эта бошладим. Мана ҳозирга келиб, касаллик нималигини билмайман, кучлиман, қоматим ҳам чиройли. Бу албатта, спорт билан шуғулланишим натижасидир. Бу йўлни танлаганимдан беҳад мамнунман.
Андижон шаҳридаги 4-умумтаълим мактабини тамомлаб, Андижон Олимпия заҳиралар коллежига ўқишга кирдим. Бу ердаги устозларим Исмоилжон Аҳмедов, Бахтиёржон Аҳмедов, Нодирахон Жакбаровалар кўмагида қўл тўпининг ўзига хос, нозик жиҳатларини, техникасини ўргандим. Устозларимнинг эътибор ва талабчанлиги билан коллежимизда уюшган қўл тўпи жамоаси шаклланган. Жамоамиз аҳил, ғалаба учун охиригача баҳс олиб борадиган шижоатли ёш спортчилардан ташкил топган.
Шу боис ҳам жамоамиз, жамоа таркибида мен ҳам спортда кўплаб ютуқларга эришдик, кўп карра Ўзбекистон чемпиони бўлдим. Мамлакатимиз ёшлар терма жамоаси аъзосиман. Терма жамоа сафида 2011 йили Россиянинг Тольяти шаҳрида ўсмирлар ўртасида бўлиб ўтган турнирда 3-ўринни эгалладик. 2013 йили Италиянинг Флоренция шаҳрида бўлиб ўтган халқаро турнирда фахрли биринчи ўринни олдик. Шунингдек, ўтган йили Таиландда 18 ёшгача бўлган ёшлар ўртасида ўтказилган Осиё чемпионатида 4-ўринни эгаллаб, жорий-2014 йилда Македонияда қўл тўпи бўйича 18 ёшгача бўлган ёшлар ўртасида бўлиб ўтадиган жаҳон чемпионатида қатнашиш йўлланмасини қўлга киритдик. Умуман, жуда кўп мусобақаларда ғолиб чиқдик, икки нафар жамоадошим олий ўқув юртига имтиёзли кириш ҳуқуқига эга бўлди. Бу натижалар, энг аввало, юртимизда спортга кўрсатилаётган эътиборнинг, биз ёшларга яратиб берилаётган кенг имкониятларнинг самарасидир.
Қўл тўпи бўйича вилоятимиз қизлар жамоаси "Баркамол авлод-2014" спорт ўйинлари саралаш баҳсларида Самарқанд, Хоразм ва Тошкент вилояти жамоалари устидан ғолиб чиқиб, мусобақанинг финал ўйинларида қатнашиш ҳуқуқини қўлга киритган. Бизнинг бош мақсадимиз ва асосий вазифамиз "Баркамол авлод-2014" спорт ўйинлари финал қисмида ҳам ғолиб бўлишдир. Ана шу мақсадга эришиш учун бор имкониятларимизни ишга соламиз.
Ҳилола ҚОДИРЖОНОВА,
Андижон олимпия заҳиралари коллежи ўқувчиси.
|