БИЗНИНГ СУҲБАТ

АЛЛЕРГИЯ - МАВСУМИЙ КАСАЛЛИК

Бугунги кунда атроф-муҳит ифлосланиши оқибатида аҳоли ўртасида аллергия касаллиги билан оғриганларнинг сони ортиб бораётганини кузатиш мумкин. Шу боис, бугунги суҳбатдошимиз вилоят ташхис маркази шифокор - аллергологи Азиза Карачаевадан аллергия касаллиги хусусида суҳбатлашдик.

- Аллергия касаллиги ҳақида тушунча берсангиз?

- Аллергия аллергонлар (кимёвий моддалар, микроб-лар ва уларнинг ҳаёти фаолиятида ҳосил бўладиган маҳсулотлар, яъни озиқ-овқатлар) таъсирида организмнинг ўта сезгир бўлишидир. Аллергик касалликларнинг турли кўринишлари мавжуд: бронхиал астма, поллинозлар, эшакем, аллергик тумов, озиқ-овқат аллергияси ва бошқалар. Кузатишлар шуни кўрсатадики, бу касалликка чалинган ота-онадан дунёга келган фарзандларнинг 60-80 фоизи аллергия билан оғриши мумкин.

- Бу касалликнинг келиб чиқишига сабаб нима?

- Бунинг сабаби сифатида ноқулай иқлим шароитини, экологиянинг бузилишини, турмушимизда кимёвий моддалардан фойдаланишимизни, техника, саноат тараққиётини кўрсатишимиз мумкин. Бошқача қилиб айтганда аллергия - тараққиёт касаллиги. Шу сабаб ҳам бу касаллик билан оғриганларнинг кўпи аллергиянинг турли кўринишлари билан касалланганлиги аниқланган. Умуман олганда, бу касалликка чалинганларнинг кўпчилигини 35 ёшгача бўлган кишилар ташкил этади. Касаллик кўпроқ 20-40 ёшли хотин-қизларда учрайди.

- Айтинг-чи, касалликнинг олдини олиш ва даволаш учун нималарга эътибор қаратиш лозим?

- Энг аввало, аҳолининг тиббий саводхонлигини ошириш керак. Ана шундагина беморлар салбий оқибатлар юзага келмасдан шифокорга мурожаат этишарди. Айниқса, ўзида ёки турмуш ўртоғида касаллик бор ҳомиладор аёллар ҳомиланинг бошланғич даврлариданоқ эътиборли бўлиши керак. Чунки эътиборсизлик оқибатида бугунги кунда чақалоқларнинг 70 фоизи аллергик диатез билан дунёга келяпти. Аллергик диатезнинг борлиги боланинг аллергик касаллик билан туғилганлиги ҳисобланади. Боланинг ривожланиш босқичларида тез-тез йўталиб қолиши, гриппга ўхшаш ҳолатларнинг борлиги (кўз қичишиши, буруннинг қизариши, сув келиши, бола овозининг ўзгариши, оғир ҳолатларда йўталнинг тунда бўлиб, нафас етишмовчилиги, иситмасиз кечиши) аллергик ҳолат ҳисобланади. Шунинг учун ҳам ҳомиладор аёллар шамоллашдан ва унга қарши турли дориларни қабул қилишдан ўзларини асрашлари керак. Қолаверса, овқатланишда ортиқча оқсиллар, поливитаминлар олиш ҳам она организмида сентибилизацияни келтириб чиқаради. Бу ҳолатда ўз-ўзидан аллергия касаллиги юзага келиши мумкин. Бир сўз билан айтганда, ҳар бир инсон ўзининг ва яқинларининг саломатлиги учун қайғуриши лозим.

Бунинг учун атроф -муҳитнинг ифлосланиши оқибатида келиб чиқадиган ушбу касалликнинг хавф - хатарига бефарқ бўлманг. Касаллик ривожланмай туриб, шифокор қабулига боришни, уларнинг маслаҳатига қулоқ тутишни унутманг.

Зумрадхон АБДУЛЛАЕВА суҳбатлашди.