ЖОНЛИ МУЛОҚОТ

Андижон шаҳар маҳалла фуқаролар йиғинларининг бир гурух отинойилари Андижон шаҳридаги "Саховат уйи"да бўлдилар. Улар кексалар холидан хабар олиб, ўзларининг ҳадяларини инъом этдилар. Бу эътибор туфайли кўнгли ўксик кишиларга қувонч улашдилар.

Шу куни шаҳар хотин-қизлар қўмитаси ва маҳалла фуқаролар йиғинлари фаолларининг навбатдаги давра суҳбати М.Алибой маҳалласида бўлиб ўтди. Унда Андижон шаҳар ҳокими ўринбосари, шаҳар хотин-қизлар қўмитасининг раиси М. Ваққосова иштирок этиб, тўй ва бошқа маросимларни ихчам, камҳарж қилиб ўтказиш ҳақида фикр-мулоҳазаларини билдирди. Вилоят бош отинойиси С. Расулова отинойиларнинг диний ва дунёвий билимларини ошириш, шу билан бирга, қизларнинг кийиниши, юриш-туриш одоби, муомала маданияти хусусида гапирди. "Машҳура" ўқув маркази раҳбари З.Тиллаева кам таъминланган оила фарзандларини бепул ҳунар ўрганишлари учун кўмак беришга тайёр эканлигини билдирди.

Қизиқарли тарзда ўтган давра суҳбати иштирокчиларга ўз фаолиятларига доир билим ва малакаларини ошириш имконини берди.

З. АБДУЛЛАЕВА.