МАРК ТВЕН, Америка адиби.

Сабоқ

Бир ўзига тўқ бойвачча хоним машҳур санъаткор Корнейни уйига таклиф қилди. Хоним Корнейга унинг қўшиқларини жуда ёқтиришини, санъатни қадрлашини айтди. Лекин у меҳмоннинг тушлигини хизматкорлари ёнига - пастки қаватга буюрди. Камтарин ва олижаноб санъаткор буни рад этмади, ранжимади ҳам. У яхши тушлик қилгач, атрофида ўтирган ўз мухлисларига - хизматкорларга шундай мурожаат қилди:

- Менинг азиз дўстларим, - деди у хотиржамлик билан. - Энди мен сизлар учун куйлайман.

Хизматкорлар бундай такаллуфдан ҳам ҳайрат, ҳам қувончга тўлишди. Пианино йўқлигига қарамай, у хизматкорларга бир соат давомида нафис ва жозибадор қўшиқлар куйлади ва уларнинг вақтини чоғ қилди. Соат роппа-роса ўнда хоним санъаткорни меҳмонхонага таклиф қилди. Корней мезбон ортидан даврага ташриф буюрди. Меҳмонлар уни қарсаклар билан қарши олишди:

- Биз сизни интиқлик билан кутяпмиз! - дейишди улар.

- Нимага?

- Сизнинг дилтортар наволарингиздан баҳраманд бўлмоқлик учун!

- Лекин мен аллақачон куйлаб бўлдим! - деди Корней ва давом этди, - ва мен бир кечанинг ўзида икки марта куйламайман.

- Наҳотки! Қачон?

- Бир соат олдин, пастки қаватда.

- Қандай қилиб ахир, бу бўлиши мумкин эмас? - қичқирди хоним ғазаб билан.

- Ўйлайманки, сиз азиз меҳмонларнинг у ерда бўлмаганингиз, албатта, бироз қизиқ бўлди, лекин биласизми, мен ҳар доим мухлисларим билан тушлик қиламан.

У шу сўзларни айтиш баробарида хонани тарк этди. Ўзига ҳаддан зиёд бино қўйган кибор хоним эса аламдан бир сўз деёлмади.

Инглизчадан

Моҳинур СИДДИҚОВА

таржимаси.