Бола ҳуқуқлари давлат ҳимоясида

Андижон вилояти ҳокимлигида Ўзбекистон Республикаси Олий суди, Фуқаролик ишлари бўйича Андижон вилоят суди ва вилоят хотин-қизлар қўмитаси ҳамкорлигида "Бола ҳуқуқлари давлат ҳимоясида" мавзусида семинар бўлиб ўтди.

"Соғлом бола йили" Давлат дастурида белгиланган вазифалар ижросини таъминлаш, ёш авлоднинг ҳуқуқ ва манфаатларини ҳимоя қилиш борасидаги меъёрий-ҳуқуқий ҳужжатлар ижроси ва бу борада олиб борилаётган ишлар самарадорлигини ошириш мақсадида ўтказилган тадбирда болалар соғлигини сақлаш, вояга етмаганлар ўртасида назоратсизлик ва ҳуқуқбузарликлар профилактикасини амалга оширишда таълим муассасалари, ҳуқуқ-тартибот идоралар ва ота-оналар ҳамкорлигини мустаҳкамлаш, бола ҳуқуқларини ҳимоя қилишда васийлик ва ҳомийлик кенгашларининг масъулияти сингари қатор масалалар хусусида атрофлича сўз юритилди.

Семинарда мамлакатимизда бола ҳуқуқларини ҳимоя қилиш, вояга етмаганларга яратиб берилган шарт-шароитлар ҳақида видеоролик намойиш этилди.

Мутахассислар, тадбир иштирокчилари томонидан мазкур йўналишдаги ишлар сифати ва самарадорлигини ошириш юзасидан таклиф, фикр ва мулоҳазалар билдирилди. Мавзу доирасида савол-жавоблар бўлди.

Семинар ишида Андижон вилояти ҳокимининг ўринбосари вилоят хотин-қизлар қўмитаси раиси М. Юнусова иштирок этди.

Дилшодбек АСҚАРОВ.