ЭНГ НАМУНАЛИ БОШЛАНҒИЧ ХОТИН-ҚИЗЛАР ТАШКИЛОТЛАРИ АНИҚЛАНДИ

З. М. Бобур номли вилоят мусиқали драма ва комедия театрида анъанавий тарзда ўтказиб келинаётган "Энг намунали хотин-қизлар қўмитаси бошланғич ташкилоти" кўрик-танловининг Андижон вилоят босқичи бўлиб ўтди.

Тадбирда хотин-қизларнинг жамият ижтимоий ва сиёсий ҳаётидаги иштироки ва фаоллигини ошириш, ҳуқуқ ва манфаатларини ҳимоялаш, маънавий ва интеллектуал салоҳиятини юксалтиришда бошланғич ташкилотларнинг ўрни ва роли ортиб бораётганлиги, бошланғич ташкилотлар томонидан турли йўналишларда, айниқса, хотин-қизларни иш билан таъминлаш, тадбиркор аёлларни ҳар жиҳатдан қўллаб-қувватлаш, ёшларни ҳунарга ўргатиш масалаларига алоҳида эътибор қаратилаётгани таъкидланди.

Юқори савияда ўтказилган танловнинг вилоят босқичида маҳаллалар, ўқув ва тиббиёт муассасалари, ташкилот ва корхоналар, шунингдек, олий ўқув юртларининг бошланғич хотин-қизлар ташкилотларининг фаолиятлари белгиланган шартлар бўйича ўрганиб чиқилиб, олтита номинация бўйича ҳар жиҳатдан самарали фаолият олиб бораётган энг намунали бошланғич ташкилотлар аниқланди.

Тадбирда вилоят ҳокимининг ўринбосари, вилоят хотин-қизлар қўмитаси раиси М. Юнусова иштирок этиб, ғолиб ва совриндорларни муборакбод этди, уларга диплом ва эсдалик совғалар топширди

Ф. ИБАЙДУЛЛАЕВ.