Ривоят

ФАРЗАНД - ОТА-ОНА ЗИЙНАТИ

Қадим замонда бир шаҳар бошлиғининг хотини шаҳардаги мўътабар одамларнинг хотинларини зиёфатга чақирди. Меҳмонлар тайин этилган вақтда ташриф буюрдилар, ўриндиққа ўтириб, овқат келгунча, ўзларининг қимматбаҳо кийимлари, зирак, узук, зебигардон каби тақинчоқлар ҳақида сўз юритдилар, жуда қимматли зийнат буюмларига эга бўлишлари билан фахрландилар.

Шу вақт содда кийим кийган, зийнат буюмларини тақмаган бир аёл кириб келди. Бу аёл зиёфат эгасининг синглиси эди. Салом бериб меҳмонлар билан кўришди, кейин бўш бир ўриндиққа келиб ўтирди. Меҳмонлар бу аёл зиёфат эгасининг синглиси эканини билардилар, лекин унинг содда экани, зеб-зийнат буюмларини тақмагани учун ҳайрон бўлиб ундан:

- Нега содда кийингансиз? Зирак, узук, зебигардон каби қимматли нарсаларингиз йўқми?-деб сўрадилар.

У аёл:

- Менда сизларнинг қимматбаҳо буюмларингиздан кўра қимматлироқ зеб-зийнатлар бор,- деди.

Меҳмонлар кўришни истаган эдилар, аёл ташқарига чиқиб бир ўғил, бир қиз, икки ёш болани етаклаб келди, уларни меҳмонларга кўрсатиб:

- Менинг жонимдан ҳам қимматли зеб-зийнатим мана шулардир. Айтинг-чи, ота-она учун фарзанддан ҳам қимматли нарсанинг бўлиши мумкинми? Сизларнинг зеб-зийнат деб ўйлаган нарсаларингиз фарзанд олдида ҳеч нарса эмас. Келинг, ўйлаган пуч зийнатларингизга эмас, севимли фарзандларингиз тарбиясига аҳамият беринг, севимли дўндиқларингизни одобли, ахлоқли, ғайратли, жасоратли этиб ўстиринг, суҳбатингиз, фикрингиз, зикрингиз мана шу тўғрида бўлсин. Фарзанд-ота-она кўрки, ҳамма зийнатларнинг зийнати, буни эсдан чиқарманг,-деди.

Бу оқил, доно аёлнинг ҳаққоний сўзларидан меҳмон хотинлар таъсирланиб, сукут этиб ўйлаб қолдилар.

Хосият ЗИЯЕВА тайёрлади.