ҲАМКОРЛИК САМАРАЛАРИ

Вилоят хотин-қизлар қўмитаси ва Шарқий Германия жамғарма кассалари уюшмаси ҳамкорлигида "Хотин-қизлар ўртасида тадбиркорликни ривожлантириш" лойиҳаси доирасида қатор ишлар амалга оширилмоқда. Андижонга ташриф буюрган германиялик экспертлар мазкур лойиҳа доирасида олиб борилаётган ишлар билан танишдилар.

Маълумки, ана шу лойиҳа доирасида Андижон шаҳрида "Аёллар маслаҳат маркази" ташкил этилган. Мазкур марказда тадбиркорлик фаолияти билан шуғулланаётган ва мазкур йўналишда иш бошлаш истагидаги хотин-қизларга бизнес-режа тузиш, молиявий ҳисоб-китоб юритиш, кредит олиш тартиблари, янги иш бошлаган тадбиркор аёлларни қўллаб-қувватлаш, билим ва малакаларини ошириш борасида амалий ёрдамлар кўрсатилиб, зарур маслаҳат ва тавсиялар берилмоқда.

- 2012 йилда ўз фаолиятини бошлаган марказимизда хотин-қизлар тадбиркорлигини ривожлантириш, оилавий бизнесни ҳамда ёшларнинг тадбиркорлик борасидаги кўникмаларини шакллантиришга қаратилган кўплаб давра суҳбатлари, учрашувлар ва семинар-тренинглар ўтказилди, - дейди "Аёллар маслаҳат маркази" раҳбари Мавлудахон Низомова. - Ўтказилган семинар ва бошқа тадбирлар аёлларимизнинг тадбиркорлик йўналишидаги билим ва кўникмаларини юксалтиришга хизмат қилмоқда.

Меҳмонлар дастлаб Андижон шаҳри Мирпўстин маҳалласидаги оилавий тадбиркор Дилоромхон Жалилова хонадонида бўлишиб, тадбиркор олиб борилаётган ишлар билан танишдилар. Бу ерда тайёрланаётган миллий ва замонавий либослар меҳмонларда катта қизиқиш уйғотди.

Шундан сўнг хорижлик меҳмонлар "Аёллар маслаҳат маркази"да ташкил этилган миллий либослар ҳамда ҳунармандчилик буюмлари кўргазмасини кўздан кечирдилар. Марказда тадбиркор ва ҳунарманд аёллар, маҳалла маслаҳатчилари, касб-ҳунар коллежлари битирувчилари иштирокида хотин-қизларни иш билан таъминлаш ва тадбиркорликка жалб этиш мавзусида ўтказилган семинарда иштирок этдилар.

Тадбирда вилоят ҳокимининг ўринбосари, хотин-қизлар қўмитаси раиси М. Юнусова иштирок этди.

Ф. ИБАЙДУЛЛАЕВ.