ЯНГИ ЙИЛ БАЙРАМИ ЯРМАРКАЛАРИ АҲОЛИ ХИЗМАТИДА

Андижон шаҳрининг 14 та ҳудудида янги йил байрами арчалари ва қишлоқ хўжалик маҳсулотлари ярмаркалари ташкил этилди.

Шу кунларда юртимизнинг барча жойларида бўлгани каби вилоятимизда ҳам янги йил байрами шукуҳи кезмоқда. Жамоаларда, таълим муассасаларида байрамни кўтаринки руҳда ўтказиш учун турли тадбирлар ўтказилмоқда. Хусусан, вилоят марказидаги 14 та ҳудудга ўрнатилиб, чиройли безатилган арчалар, улар атрофида санъат усталари ҳамда бадиий ҳаваскорлик дасталари иштирокида ташкил этилаётган концерт дастурлари аҳоли, шаҳар меҳмонлари, айниқса, болажонлар қувончига қувонч қўшмоқда.

Асосий байрам тадбирлари ўтказиладиган "Соғлом авлод" хиёбони ва Хотира майдонидаги баландлиги қарийб 25 метрга яқин бўлган янги йил арчалари барчага байрамона кайфият улашиши шубҳасиз.

Андижонликларнинг байрам дастурхони тўкин бўлиши, аҳолининг сифатли озиқ-овқат ва қишлоқ хўжалик маҳсулотлари билан таъминлаш мақсадида Андижон шаҳридаги оммавий байрам тадбирлари ўтказилиши белгиланган 14 та ҳудудда, шунингдек, барча туман ва шаҳарлар марказларида янги йил байрами ярмаркалари ташкил этилди.

Ярмаркаларда вилоятдаги қайта ишлаш корхоналари, кичик бизнес ва хусусий тадбиркорлик субъектлари, шунингдек, чорвачилик, паррандачилик ҳамда балиқчиликка ихтисослашган хўжаликлар ўз маҳсулотлари билан иштирок этмоқда.

Ярмаркаларда она заминимизнинг табиий ва витаминларга бой неъматлари, яъни деҳқону боғбонлар томонидан етиштирилган сифатли ва сархил мевалар, сабзавот ва полиз, шунингдек, сут, тухум, гўшт, балиқ, умуман, 80 га яқин турдаги озиқ-овқат ва қишлоқ хўжалиги маҳсулотлари харидорларга тақдим этилмоқда.

Янги йилнинг 5 январига қадар давом этадиган мазкур ярмаркалар аҳолига катта қулайлик яратиш билан бирга, халқимизнинг байрам кайфиятини кўтаришга хизмат қилмоқда.

Ф. ИБАЙДУЛЛАЕВ.