БАХТИМГА ОМОН БЎЛ, МУНИС АЁЛИМ

Фасли гул баҳорлар, кўкламлар ўтар,

Шодликлар, ситамлар, аламлар ўтар,

Гўзал нозанинлар, санамлар ўтар,

Чин севгим асраган жуфти ҳалолим -

Бахтимга омон бўл, мунис аёлим!

Ёлғизим, бир умр йўлдошим ўзинг,

Қувончу дардимга сирдошим ўзинг,

Жонимни авайлаб хавотир кўзинг,

Кўнглимга қараган, сўзлари болим,

Бахтимга омон бўл, мунис аёлим!

Кунларим ўтганда йўлда, сафарда,

Сен мени ўйлайсан, шому саҳарда,

Йўл қараб ором йўқ, сен зулфизарда,

Келсам, гул яшнаган, қоши ҳилолим -

Бахтимга омон бўл, мунис аёлим!

Дўстлар, бир майизни бўлишганларим,

Зор қолсам қадамин тийишганларим,

Бир йўқлаб келмаса туғишганларим,

Кунимга яраган, нозик ниҳолим -

Бахтимга омон бўл, мунис аёлим!

Айт, сени эҳтиром этмайин нечун,

Зурёдлар - ортимда изларим учун,

Маржондай ҳар ўғил-қизларим учун,

Ҳақ нурин сўраган, қалби зилолим -

Бахтимга омон бўл, мунис аёлим!

Қошу қабоғингга ҳеч қўнмасин гард,

Артсанг, фақат севинч кўз ёшингни арт,

Сенга ҳар кун бўлсин саккизинчи март,

Табассуми ширин - лаблари болим,

Бахтимга омон бўл, жуфти ҳалолим!

Шаробиддин БОЛТАБОЕВ.