Дунё ажойиботлари

КОСМОС ВА ИНСОН РУҲИЯТИ

2014 йилнинг ноябрь ойи охирлари эди. Байконурдан коинотга навбатдаги космик кема учирилди. Парвоз давомида экипаж аъзолари ғаройиб ҳодисага дуч келишди. Уфологлар Юрий Григорьев ва Анна Ажажанинг сўзларига қараганда, "Союз" космик кемаси экипажи жойлашган кабинада оқ доғлар кўринган. Бу кемага ўрнатилган видеокамералар муҳрлаган тасвирларда ҳам аниқ кўзга ташланди.

Уфологлар ана шу ҳодисани "Ўзга сайёраликлар ерликларга ўзлари ҳақида маълум қилиб, алоқага киришмоқчидек эди", деб таъкидладилар.

Орадан икки сутка ўтгач, Россиянинг учишга шай қилиб қўйилган "Протон-М" ва "Ангара -А 5" русумли ракеталарининг парвози қолдирилди. Негаки, бу икки ракетада ҳам "Союз"даги каби оқ жисмлар кўринган. "Демак, улар бизни огоҳлантиришмоқда", дейишди Григорьев ва Ажажа.

Юрий Гагариннинг парвози бор-йўғи 108 минут давом этган. Бироқ бу вақт ичида 27 ёшли учувчи умрида эшитмаган овозларни эшитганлигини космонавт кейин жуда кўп айтиб ўтган. Хусусан, биринчи парвозидан анча вақт ўтиб, машҳур учувчи электрон мусиқа асбоблари жўрлигидаги ансамблнинг концертига кирганда бирдан ҳайратга тушади. Чунки у "Восток-1"даги парвози даврида худди шу каби мусиқий овозларни эшитган эди. Кейинчалик бу каби куйлар бошқа космонавтларнинг қулоқларига ҳам чалингани маълум бўлди.

"Союз-7" космик кемасининг борт инженери Владислав Волков берган интервью янада ҳайратланарли. "Пастда ердагидек сокин тун ҳукмрон эди. Бирдан итнинг ҳургани эшитилди. Оддий дайди итнинг овози... Бир неча сониядан сўнг эса чақалоқнинг йиғиси қулоққа чалинди. Яна аллақандай тушунтириб бўлмайдиган овозлар кишини саросимага солади".

Олимлар бундай ҳолатларни оддий товушли галлюцинация деб ҳисоблашади. Инсон қаттиқ чарчаганда, стресс ҳолатларга тушиб қолганда бундай овозларни эшитади, деб таъкидлайди улар.

Одамзод космосда бу каби кўплаб ажойиботларнинг, сирли ҳодисаларнинг гувоҳи бўлган. Техника фанлари доктори, синовчи-учувчи Марина Папович томонидан узоқ йиллар давомида йиғилган маълумотлардан келиб чиқиб, мутахассислар космос инсон руҳияти, унинг сезгиларга хаддан ташқари кучли таъсир этади, деган хулосага келдилар.

Масалан, космосда инсоннинг кўриш қобилияти ортиб кетади. Бошқача айтганда, космосда жисмлар катталашган ҳолда кўринади. Америкалик учувчи Гордон Купер Тибет устидан ўта туриб (баландлиги 350-400 километр бўлган жойдан) ер юзидаги уйлар ва қурилишларни кўз билан кўра олган. Космонавт Виталий Севастьянов эса орбитадан туриб Сочидаги болалиги ўтган уйни аниқ кўрганлигини гапириб берди. Бир гуруҳ учувчилар эса трассада ҳаракатланаётган автомобилларни кўришганини айтишди.

Космосдан туриб қаралганда, океанлар ажиб кўринишда бўлади. 1973 йилда Америка станциясидан учирилган "Скалэб" кемаси экипаж аъзоларининг айтишича, Бермуд учбурчаги атрофида сувнинг пасайиши кузатилган. Гўёки жуда катта майдонда, тахминан миллион квадрат километр ҳажмдаги оралиқда Бермуд, Флорида ва Пуэрто-Рико ороллари ўртасида океан "чўккан". Собиқ иттифоқ космонавтлари эса аксинча, 200-300 километр ҳажмдаги океан "гумбазлари"ни кўришган. Уларнинг таъкидлашича, сув ўз сатҳидан 100 километргача "кўтарилган". Улар сувнинг тубини аниқ кўрганликларини таъкидлаганлар. Мутахассислар эса буни инкор этишмоқда. Негаки, жуда тиниқ сув ҳам бундай чуқурликда қуёш нурини йўқотади. Бироқ кейинги йилларда бу борадаги айрим фаразлар тасдиқланмоқда. Масалан, Тинч океанида тоғ занжири борлиги аниқланди. Шундан келиб чиқиб, олимлар "Космонавтлар океан тубидаги бошқа оптик ҳолатларни ҳам кузатишган бўлса керак" деган тахминни илгари суришмоқда.

Нима бўлганда ҳам космос инсоният учун хали жумбоқ. Унинг сир-синоатларини билиш илм-фан ривожига боғлиқ. Бунинг учун қанча вақт кераклиги эса фақат Яратганнинг ўзигагина маълум.

"АиФ" газетаси материали асосида Б. ҲАЙДАРОВА тайёрлади.