"АНДИЖОНЁҒ-МОЙ"ДА БАЙРАМ ШУКУҲИ

"Андижонёғ-мой" акционерлик жамияти меҳнат жамоаси Наврўз байрамини катта тантана билан нишонлади.

"Андижонёғ-мой" акционерлик жамияти вилоятимиздаги йирик меҳнат жамоаларидан бири саналади. Айни кунда корхонада меҳнат қилаётган 700 нафардан зиёд ишчи-хизматчиларнинг 208 нафарини хотин-қизлар ташкил этади. Яқинда корхонада ишлаб чиқарилаётган пахта ёғи 2 литрли идишларга қадоқлана бошлаганлиги харидорлар учун катта қулайлик бўлди. Келгусида эса маҳсулотни 0,5 литрли ҳажмдаги идишларга қадоқлаш ва савдога чиқариш ҳам режалаштирилмоқда.

Байрам тадбирида ишчи-хизматчилар ҳамда корхонада узоқ йиллар мобайнида ишлаган, ҳозирда кексалик гаштини сураётган меҳнат фахрийлари иштирок этди. Меҳнат фахрийлари орасида ўзларининг табаррук ёшларини қарши олган Қаюмжон ота Пардабоев, Одинахон Султонова, Ирина Мирзахонова, Алла Кузнецова сингари нуроний онахон ва отахонларнинг борлиги даврага янада файз киритди.

Тадбир сўнггида корхона маъмурияти томонидан меҳнат фахрийлари ва илғорларидан 50 нафарига эсдалик совғалар топширилди.

С. ШУКУРОВ.