Нигоҳингдай лағча чўғни сололмайди парилар

Не балолиғ ўтлар солмиш бу бошима суратинг,

Синаб кўргай дўзах ичра бардошима суратинг.

Қанча пари доғда қолди, доғда қолди сулувлар,

Неча йилки кўнгил хаста, дардошима суратинг.

Кўнглим боғин пайҳон айлаб, азоб берар озоринг,

Мажнун каби куйдим, нетай, қизғин сенинг бозоринг.

Бешафқат-ла қийнагайсан юрагимни беармон,

Ҳар кун ҳалок бўлгай руҳим, етмасмиди қийноғинг.

Куйган кўнглим давосини тополмайди парилар,

Юрагимнинг маҳзун сирин билолмайди парилар.

Ҳатто музлик дунёсини эритса ҳам қуёши,

Нигоҳингдай лағча чўғни сололмайди парилар.

Қисматим ҳам аён бўлган, хор бўлгайман оқибат,

Интизорман ёр меҳрингга, зор бўлгайман оқибат.

Машраб каби девонаман, фақат қолган суратим,

Мен тупроққа ёр бўламан, кўмилгайман оқибат.

Аъзамжон МАҚСУДОВ.