ЁНМА-ЁН

Ёнма-ён сўзи ҳамиша яқин, ҳамиша ёқимли. Қани эди бу ҳаётда ҳамиша ёнма-ён юрсак, турсак, яшасак...

Қиқир-қиқир кулаётган болакай ўзи дадил қадам ташласа ҳам бир қўлида онасининг, яна бир қўлида отасининг қўлидан тутиб, улар билан ёнма-ён юрсагина ўзини эркин ҳис қилади. Улар билан ёнма-ён дамлар энг қувончли дамлар.

Болакайлар мактабга доимо бирга, ёнма-ён боришади. Бир партада ёнма-ён ўтиришади. Сафларда ҳам ёнма-ён қўл ушлашиб юришади. Ҳатто, суратга тушаётганликларида ҳам ёнма-ён туришади. Ёнма-ён юришни улар "беғубор болалик" деб билишади.

Ёш келин-куёвлар ҳамиша бахтли, ёнма-ён юришса унданда бахтли. Улар ёнма-ён туриб, никоҳдан ўтишган. Катта базм даврасида яқин қариндош-уруғлари ёнма-ён туриб, сўзга чиқишган, ёнма-ён рақсга тушишган. Дўстлари уларга бир умр ёнма-ён ҳаёт кечиришларини тилаб ниятлар қилган.

Одамлар маҳаллаларда бир-бирлари билан ён қўшни бўлиб яшашади. Бир кун кўришмаса, бир-бирларини дарров сўраб қолишади. Қаерга боришмасин қўшнисини сўрашса, чин кўнгилдан "вой, нега танимай, ахир ёнма-ён яшаймиз-ку", дея юзида мамнуният пайдо бўлади.

Халқимизда "эр хотин - қўш хўкиз", дея айтилган хазиломуз гаплар бор. Бу нақлнинг таг замирида ҳам ёнма-ён яшаш деган тушунча мавжуд. "Дўст бўлсанг, ёнимда тур", деган хитоб эса аҳилликка ишора.

Бу ҳаётда ёнма-ён туриб айрилганлар ҳам кўп. "Урушга дўстим билан бирга бордик" хотирлайди кексалардан бири. "Ёнма-ён жанг қилдик, лекин у ҳозир йўқ бу ёруғ дунёда. Ҳамон ўша ёнма-ён юрган дамларни унутолмайман..."

"Собиқ талабалар гапларига қулоқ тутсангиз, улар ҳам бир хонада, бир қаватда ёнма-ён яшаганликларини завқланиб, соғинч ва орзиқиш билан эсга олишади. Яна "қани эди ўша қиз билан бир дақиқа бўлса ҳам ёнма-ён турсам", дея орзу қилади ошиқ йигит... афсус тақдир битигидан қочиб бўлмайди.

Ҳаётда менинг орзуларим осмонча баланд, уммондек кенг. Улардан энг олийси эса яқинларим ва дўстларим билан ёнма-ён ҳаёт кечириш...

Ҳаёт узун йўллардан иборат. Истайманки, одамлар шу йўлларда ҳамиша ёнма-ён юришсин...

Абдураҳим БОЗОРБОЕВ.