Тавсиялар

СОҒЛОМ ТУРМУШ ТАРЗИНИНГ 10 ОЛТИН ҚОИДАСИ

Соғлом турмуш тарзи дегани - бу жисмонан ҳамда руҳан баркамоллик, фaoл меҳнат, ўта хавфли ва зарарли таъсир кўрсатувчи омилларни енга оладиган, етукликка интилувчан шахснинг шаклланиш жараёни ҳисобланади. Ана шундай соғлом шахс ва оилалардан ташкил топган жамият фаровонликка эриша олади.

Бутун Жаҳон Соғлиқни сақлаш ташкилоти тарқатган маълумотларига кўра, соғлигимизнинг 50-55 фоизи турмуш тарзимизга, 18 фоизи ирсий касалликларга, 17 фоизи экологияга, 8-10 фоизи эса тиббиёт ходимларининг сифатли ва малакали ёрдам кўрсатишларига боғлиқ экан. Бундан кўриниб турибдики, соғлом ҳаёт кечириш кўпроқ инсоннинг ўзига боғлиқ экан.

Ана шундан келиб чиқиб, муштарийларимизга соғлом турмуш тарзининг қуйидаги 10 та олтин қоидасини эслатиб ўтамиз. Зеро, ана шу тавсия ва қоидаларга амал қилсангиз, шубҳасиз, соғлом ва чиройли ҳаёт кечира оласиз. Демак:

1-қоида. Шахсий гигиена қоидаларига, яъни тозаликка алоҳида эътибор қаратинг.

2-қоида. Ҳар куни бадантарбия билан шуғулланинг. Серҳаракат бўлинг, ўз вақтида дам олинг.

3-қоида. Кун тартибингизни тўғри ташкил этинг. Бу юзага келиши мумкин бўлган турли ноқулайликлардан сизни халос этади.

4-қоида. Тўғри, ўз вақтида овқатланишга қатъий амал қилинг. Витаминларга, углеводларга бой сабзавот ва меваларни кўпроқ истеъмол қилишга алоҳида эътибор беринг.

5-қоида. Эрта турмуш қуришга, яқин қариндошлар билан никоҳдан ўтишга йўл қўйманг. Чунки ана шундай ҳолатлар асосида қурилган оилаларда онги тўлиқ шаклланмаган, жисмоний ва ақлий томондан нуқсонли фарзандлар дунёга келиши мумкин.

6-қоида. Зарарли одатлардан воз кечинг. Спиртли ичимликларни кўп ичишдан воз кечинг, кашандалик ва гиёҳвандликка асло ружу қўйманг. Бу нафақат, соғлигингизни, балки ҳаётингизни издан чиқариб юборади.

7-қоида. Бахтсиз ҳодисалар, жароҳат етказувчи турли омиллардан ўзингизни эҳтиёт қилинг.

8-қоида. Ҳар бир ишда белгиланган тартибларга, хавфсизлик қоидаларига қатъий амал қилинг.

9-қоида. Доимий равишда спортнинг бирор тури билан шуғулланишга одатланинг.

10-қоида. Қалбингиз ва руҳиятингизни пок сақланг. Ҳамиша яхшилик ва эзгулик ҳақида ўйланг.

Айтиб ўтилган қоидаларга амал қилсангиз, ҳар қандай дарддан фориғ бўласиз. Ирода, сабр-тоқат билан турмуш тарзингизда ана шу қоидаларни тўла шакллантириб олсангиз, ҳаётингизни янада гўзал ва мазмунли қила оласиз. Соғлом, бахтли ва узоқ умр кўриш кўп жиҳатдан ўзингизга боғлиқ эканлигини унутманг.

Андижон педагогика коллежи

психология кафедраси

ўқитувчилари

Mоҳинора РАҲИМОВА,

Барчиной ЎРИНБОЕВА

тайёрлади.