Огоҳлик - давр талаби

АЁЛЛИК ШАЪНИНИ УНУТМАНГ!

Мамлакатимизда қонун устиворлиги таъминланган. Юртимиз ва хориж фуқаролари томонидан чегара постлари орқали олиб кириладиган ва олиб чиқиб кетиладиган буюмлар ва маҳсулотлар қатъий белгилаб қўйилган.

Шунга қарамай айрим шахслар томонидан мавжуд қонунларимизга амал қилинмаётгани оқибатда нохушликлар келиб чиқмоқда. Турли диний мазмундаги ҳамда тарбиясизликни тарғиб қилувчи, миллий менталитетимизга зид аудио ва видеороликларнинг юртимиз ҳудудига олиб киришга бўлган хатти-ҳаракатлар давлатимиз тинчлигига рахна солишга уринаётганликнинг, қонунларимизга бўлган ҳурматсизликнинг бир кўринишидир. Айниқса, бундай ноқонуний ҳаракатлар сабабчилари орасида аёлларнинг борлиги кўнгилни хира қилади. Вилоятимиз божхона бошқармаси чегара постларида аниқланган қуйидаги ҳолатлар фикримизга далилдир.

"Дўстлик" чегара божхона комплекси орқали Қирғизистон Республикасидан юртимизга кириб келаётган Россия Федерацияси фуқароси Саодат Маматқулованинг "Samsung Duos GT-I906" русумли уяли алоқа телефони текширилганда, хотирасида 46 та видео кўринишдаги, 35 та аудио кўринишдаги ҳамда 53 та диний мазмундаги китоблардан кўчирилган суратлар борлиги аниқланган. Ушбу хатти-ҳаракат бўйича суриштирув ишлари олиб борилмоқда.

Шунингдек, худди шу чегара божхона комплексида қуйидаги ҳолат ҳам аниқланган. Қирғизистон Республикасидан Ўзбекистон Республикасига кириб келаётган юртимиз фуқароси Дилфузахон Тоированинг қўл ва бошқа юклари назоратдан ўтказилганда, йўловчи божхона декларациясида кўрсатилмаган "htc" русумли уяли телефони хотирасида 15 та порнографик (беҳаё) тасвирлар жамланган видеороликлар борлиги аниқланган. Ушбу иш юзасидан суриштирув ҳаракатлари олиб борилмоқда.

Юқорида келтирилган нохуш ҳолатларнинг сабабчилари айнан аёллар эканлиги, улар ўз қилмишлари билан аёллик шаънига доғ тушираётганлигини оқлаб бўлмайди.

Азиз опа-сингиллар! Қонун барча учун баробар эканини унутманг.

Андижон вилояти божхона

бошқармаси матбуот хизмати.