Онамсан, жонимсан, ҳур Ўзбекистон!

Сенинг бағрингдаги эрка қизингман,

Бахтнинг булоғидан сипқориб ичган.

Зулфияга издош бир юлдузингман,

Юксак орзуларни эркалаб қучган.

Она Ўзбекистон, онамсан менинг,

Манглайи ёруғу қучоғи тафтли.

Бутун олам ичра сира йўқ тенгинг,

Ҳар битта ўғилу қизларинг бахтли.

Буюк аждодларнинг ота макони,

Эркдан қувват олган олтин тупроқсан.

Истиқлолинг берган улкан имконни

Шукронага тутган нурли маёқсан.

Ватан, меҳринг бунча бебаҳо неъмат,

Юракларга туташ соғинчинг ҳар он.

Қизингман, аслида борлигинг ҳиммат,

Онамсан, жонимсан, ҳур Ўзбекистон!

Гулшода ҚЎЛДОШЕВА.