Қатра

КЕКСАЛАРНИНГ ДИЛИ РАНЖИМАСИН

Қизининг иссиғи тобора кўтарилар, Дилдора унинг ҳароратини туширишга уринарди. Турмуш ўртоғига шунча қўнғироқ қилса-да, ундан жавоб бўлмагани яна-да алам қиларди. У шошиб "тез ёрдам" чақирганди. Мана у ҳам етиб келди. Шифокор боланинг аҳволи жиддийлигини айтиб, уларни касалхонага олиб кетди.

Акмал уйга кириб келганда, тун ярмидан ўтганди. Эшик қўнғироғини шунча босса-да, ичкаридан жавоб бўлмади. Ёнидаги ўзининг калитини олиб, аста эшикни очди. "Қаттиқроқ ухлаб қолишгандир, безовта бўлишмасин", хаёллади Акмал. Аммо уйда ҳеч кимнинг йўқлиги уни хавотирга сола бошлади. Боягина мажлисда ўчириб қўйган қўл телефони ёдига тушди. Шоша-пиша чўнтагидан олди-да, ёқди. Телефон ёниши билан бирин-кетин смс - хабарлар кела бошлади. Қарасаки, Дилдора бир неча бор қўнғироқ қилибди. Юраги бир кўнгилсизликни сезган Акмал унга телефон қила бошлади. Телефонида Акмалнинг рақами чиққанини кўрган Дилдора жавобга шошилди...

Акмал касалхонага етиб келганда, қизчасини операцияга олиб кириб кетишганди. "Кўричак тўсатдан безовта қилгану, боласининг қорнидаги дастлабки оғриққа она бўлиб ҳам эътибор бермаган, иссиғи кўтарилгач, яхшиям, хавотирланиб, "тез ёрдам" чақиргани" - Дилдоранинг кўнглидан шу ўйлар ўтаркан, яқиндагина қайнонасига қилган дилхираликлари эсига тушди.

Саломат хола ўғлининг қистови билан уларнинг уйига келиб яшаётганди. Акмал хизмат тақозоси билан бошқа вилоятда истиқомат қилгани боис, ёлғиз онасининг қўлида улғайгани, ота меҳридан эрта айрилгани учунми, хартугул, онасига кўпроқ суянарди. Акаси билан бирга яшайдиган онасини кўндириш осон бўлмади. Хуллас, қайнонасининг ташрифи келинга илк кунлардаёқ ёқмади. Акмал эрта кетиб, кеч келади - Дилдоранинг онасига бўлган совуқ муносабатини билмайди. Набирасини еру кўкка ишонмайдиган Саломат бувининг меҳрибонликлари, қизчасига гирдикапалак бўлиши Дилдоранинг ғашини келтирарди. Буни сезган, ўзининг бу уйда ортиқчалигини ҳис қилган қайнона узоқ қололмади. Ўғлининг қаршилигига қарамай, ўз уйига кетди.

Дилдора ҳозир шуларни ўйларкан, ўшанда қайнонасининг дилини оғритганини, агар улар бўлганида фарзандининг соғлигига беэътибор қолмаслигини дилидан ўтказди. Тонгдаёқ қайнонасига қўнғироқ қилиб, улардан узр сўрашни ва албатта, турмуш ўртоғига айтиб, Саломат бувини уйларига олиб келишни, энди уларни жуда-жуда қадрлашни кўнглига тугди...

ЗИЛОЛА.