Ҳаёт - ибрат мактаби

ЯХШИ КЕЛИН -ХОНАДОННИНГ КЎРКИ

Келинлар ҳақида гап кетганда кўп ҳолларда, айниқса, қайнота-қайноналарнинг улардан нолишларига дуч келамиз. "Келин ўз қизингдай бўлолмас экан" деган иддаоларни кўп эшитамиз. Аммо орамизда шундай келинлар борки, ўрни келса, фарзандингиздан ҳам аъло бўлишади.

Абдуманноб деган қадрдон дўстим бор. Оиласи - тинч. Аёли ҳам дилкаш, меҳмондўст, яхши аёл эди. Уч ўғил, бир қизни вояга етказишди. Ўғилларини уйлаб, биттасини янги ҳовлига кўчиришди. Икки келин катта ҳовлида яшарди. Кампири беш-ўн кун касал бўлиб ётдию умри қисқа экан, қазо қилди. Ҳаётининг сўнгги дамларида онаизор ёлғиз қизини муносиб жойга узатишни келинларига васият қилди. Орадан икки йил ўтиб, қизини яхши бир оилага узатдилар, келинаялари унга онаси йўқлигини асло билдирмадилар, сеп-сидирғаларини зиёда қилдилар.

Йўлим тушиб, дўстимни йўқладим. Чақирсам, катта келини Манзурахон чиқди. Илиқ кутиб олди. Дўстим ҳовлида иш қилаётган экан. Кирдим, катта ҳовли саранжом-саришта. Айвоннинг саҳнида ранг-баранг гуллар! Ойнаванд айвондаги гултувакларда ҳам гул! Абдуманноб билан қучоқ очиб кўришдик. У мени меҳмонхонага бошлади. Хонанинг дид билан безатилгани, меҳмонлар учун қилинган жой менда ўзгача ҳавас уйғотди. Китоб жавонидаги китоблар, яна жавондаги шиша, чинни идишлар ўзига хос санъат билан терилганди...

Суҳбатимиз бир-бирига уланиб кетди. Келинлар бир зумда дастурхонни ноз-неъматга тўлдириб ташлади. Бир-икки пиёла чой ичиб-ичмай, шўрва келди. Гап бориб келинларга тақалди.

- Дўстим, келинлардан сўз очиб қолдингиз. Мақтанишга йўймангу, келинларимни Яратганнинг ўзи берган. Бири биридан одобли, ширинсўз. Ўзим ҳам уларнинг ишларига, тутумига, менга, қизимга, хонадонимизга кириб келган ҳар қандай меҳмонга бўлган муносабатларига қойил қоламан. Сира қовоқ уйганини, гап талашишганини кўрмайман. Ҳатто қизимнинг сепига менга, ўғилларимга айтишмасдан ўзларининг нарсаларидан ҳам қўшиб беришибди. Қайси келин шунақа қилади? Э дўстим, гапирсам гап кўп. Келинларим оиласида яхши тарбия кўришган экан. Уларга шундай тарбия берган ота-оналарига раҳмат дейман, - деди ғурурланиб дўстим.

Дарҳақиқат, келинларга қайнота-қайнонанинг дуоси ўз ота-онасининг истагидан тез вожиб бўлади. Келинларнинг яхшиси эса мана шундай оқила, самимийликни либос қилган, озода ва саришталаридир. Ана шундай келинлар ҳар қандай хонадонга қут-барака олиб кирадилар.

Анча суҳбатлашиб ўтирдик, сўнг дуо-фотиҳа қилдик. Келинларнинг ҳақига, айниқса, уларга яхши тарбия берган ота-оналарига алоҳида дуо қилдик. Ушбу хонадондан чиқар эканман, беихтиёр ҳар бир оила мана шундай оқила, одоб-аҳлоқли келинлар туширсин, деган ниятни дилимдан ўтказдим.

Олимжон РАҲИМОВ.