Жиноят ва жазо

ҚИНҒИР ИШНИНГ ҚИЙИҒИ

Ҳаёт аслида инсонга синов сифатида берилади. Унинг йўлларини қандай босиб ўтиш, одамлар тасаввурида яхши ёки ёмон деган тушунчани шакллантириш кишининг ўзига, қилаётган ишларига боғлиқ.

Нигора Исматова бош ҳисобчи лавозимига "кўтарилдию", анча ўзгарди. Узоқ вақтдан буён тумандаги катта мактабда оддий ҳисобчи бўлиб ишлагани учунми, бу соҳада анчагина малакага эга. Аммо бу тажриба унинг учун эзгу ишларидан кўра қинғир ишларига кўпроқ асқотди...

Мактаб директорининг яқин кишисига, ишонган ходимига айланишга улгурган ҳисобчи ўқитувчиларга берилаётган катта миқдордаги маошлар олдида нафсини бошқаролмай қолди. Раҳбар иккисининг фикри бир жойдан чиққач, ўзаро тил бириктирилди. Ҳисобчи қалбаки тўлов ҳужжатлари тузишни ҳам осон "эплади". Дастлабки "уриниш" ёмон чиқмагач, ҳеч ким сезмаганига ишонч ҳосил қилган ҳисобчи бу борада анчагина устамонга айланди. Кейинги сафар яна директор билан ими-жимида келишиб, иш ҳақларини қўшиб ёзиш билан текин даромад олиш ҳунарини давом эттира бошлади. Фаолияти давомида иш ҳақи табелларига, шунингдек, банкка топшириладиган пластик карта рўйхатларига сохта маълумотлар киритиб, "Агробанк"нинг туман филиалига тақдим қилаверган. Бунинг натижасида ўз вазифасини суистеъмол қилган ҳолда 3 миллион сўмдан зиёд бюджет маблағларини ўзлаштириб олган. Бу билан нафси тўймаган Н. Исматова ўзининг жиноий ҳаракатларини давом эттириб, қандайдир манфаат кўриш илинжида мактабнинг айрим малака тоифалари амал қилиш муддати тугаган уч нафар педагогига 539667 сўм бюджет маблағлари нотўғри тўланиб юборилишига йўл қўйган.

Қинғир ишларда ўзини устаси фаранг ҳисоблаган ҳисобчи директор ўзгаришига ҳам эътибор бермади. Янги раҳбарни ҳам ўз домига тортди. Текиндан келадиган маблағ, шу вақтга қадар "миси чиқмаган" иш янги директорга ҳам мойдек ёқиб тушди. Яна иш ҳақларини қўшиб ёзиш ҳолатлари авж олди. Мактабнинг бир гуруҳ ўқитувчилари ва ишчи-ходимларининг маошларига қўшиб ёзиш орқали жами 9267790 сўмни ташкил этувчи қалбаки тўлов ҳужжатларини тузиб, шунча миқдордаги маблағни ўзлаштириш ва растрата қилиш йўли билан талон-тарож қилган...

Қинғир ишнинг қийиғи қирқ йилни ҳам кутмади. Фирибгар Н. Исматованинг ноқонуний қилмишлари ҳуқуқни муҳофаза қилувчи орган ходимлари томонидан аниқланди. Суд қарори билан аёлга нисбатан тегишли тартибда жазо тайинланди.

Масъул лавозимда ишлаётган бу аёлнинг нафс балосига гирифтор бўлгани инсоф тамойилига, ноқонуний ҳатти-ҳаракатлари эса қонунларимизга зид эканлиги бошқа юртдошларимизни ҳушёрликка чақириши керак. Зотан, "кўза кунда эмас кунида синади" деганларидек эгри йўлдан юрган киши кун келиб, албатта, йиқилишини асло унутмаслигимиз лозим.

Инсон ўзига берилган имкониятдан оқилона фойдаланса, ўзига юклатилган вазифани виждонан адо этсагина, ишонч ва ҳурмат топа олади. Аммо ўз хизмат вазифасини суистеъмол қилиб, ўзгалар манфаатининг топталишига, давлат бюджети маблағларини талон-тарож қилинишига йўл қўйган шахснинг жазо олиши муқаррардир.

О. МАМАЖОНОВ,

жиноят ишлари бўйича Марҳамат туман суди раиси.

З. РАҲМОНОВА.