АЁЛЛАРГА ЭІТИРОМ КЎРСАТИЛДИ

8 март - Халқаро хотин-қизлар байрами вилоятимизда ҳар йилгидан ўзгача тарзда нишонланди. Байрам муносабати билан З. М. Бобур номидаги вилоят театрида ўтказилган тантанали тадбирда вилоятимиз равнақига ўзларининг фидокорона меҳнатлари билан ҳисса қўшган фахрий онахонлар, меҳнат илғорлари, илм-фан фидойилари, иқтидорли талаба қизлар, шаҳар ва туманлардан ташриф буюрган фаоллар иштирок этдилар.

Байрам тадбирини вилоят ҳокимининг ўринбосари, вилоят хотин-қизлар қўмитаси раиси М. Юнусова очди. Шундан сўнг вилоят ҳокими Ш. Абдураҳмонов сўз олиб, байрам қатнашчилари ва вилоятимизнинг барча хотин-қизларини муборакбод этди. Вилоят ҳокими ўз табригида халқимиз турмуш фаровонлигини юксалтиришга муносиб ҳисса қўшаётган, айни кунда фаоллик кўрсатаётган аёллар, истеъдодли ёшларни алоҳида эътироф этди.

Бир гуруҳ илғор хотин-қизларга вилоят ҳокимининг фахрий ёрлиғи ва эсдалик совғалари топширилди.

Оналаримиз, опа-сингилларимиз шаънига бир олам қувонч, чексиз фахр-ифтихор мадҳлари, табриклар айтилди. Куй-қўшиқларга тўла байрам шодиёналари "Тошкент" ресторанида бир пиёла чой устида давом этди. Унда вилоятимизнинг таниқли санъаткорлари ижросидаги қўшиқлар, жозибали рақслар байрам шодиёнасига ўзгача шукуҳ бағишлади.

Зилола РАҲМОНОВА.