ТИНЧЛИК-ОСОЙИШТАЛИК - ОЛИЙ НЕЪМАТ

Мустақил юртимизда тинчлик ва осойишталик ҳукмрон. Зеро, тинчлик ва хотиржамлик ҳаётимиз учун энг керакли бўлган муҳим неъматлардан биридир.

Пайғамбаримиз (с.а.в) ҳадисларининг бирида тинчлик-хотиржамлик энг катта неъмат эканлигини таъкидлаб: "Икки неъмат борки, кўпчилик инсонлар унинг қадрига етмайдилар. У - хотиржамлик ва сиҳат-саломатлик" деган эдилар. Демак, тинчлик ва хотиржамлик Аллоҳ таолонинг буюк неъмати ҳисобланади. Қолаверса, барча эзгу ишлар рўёбга чиқишининг боиси ҳам осойишталикдандир. Шундай экан, инсонлар тинчликнинг қадрига етиб, неъматларнинг борига қаноат қилиб, шукрона келтириб яшамоғи жоиз.

Таъкидлаш керакки, тинчлик бу Ислом дини шиоридир. Тинчликнинг қадрига етиш Аллоҳ буюрган амалларини ўз вақтида адо қилишлик унинг зикрини кўпайтириш билан бўлади. Аллоҳ таоло марҳамат қилади: "Бас, Мени ёд этингиз, (Мен ҳам) сизларни ёд этурман" бу ерда ёд этиш "зикр" лафзи билан келган. Зикр албатта, тил ва дил биландир. Аллоҳ таоло Қуръони каримда шундай марҳамат қилади: "Раббингизнинг (Сизга шундай) неъматларни ато этурки, Сиз албатта (ундан) рози бўлурсиз " ("Зуҳо" сураси, 5-оят).

Ибн Масъуд (р.а)дан ривоят қилинишича, Расулуллоҳ (с.а.в) шундай дедилар: "Исроъ кечаси Иброҳим алайҳиссалом билан кўришдим. У киши менга: "Эй Муҳаммад, умматингизга мендан салом айтинг ва уларга жаннат тупроғи пок, суви ширин маскан эканини хабар қилинг. Албатта, у кенг ва текисдир. Унинг ўсимлигу кўчатлари "Субханаллоҳ", "Алҳамдулиллаҳ", "Ла илаҳа иллаллоҳ", "Аллоҳу акбар"дир" дедилар". Қуръони каримдаги мана шу сўзлар калима келтирмоқлик демакдир.

Ватанимизда тинчлик-хотиржамлик ҳукм сураётганлиги буюк неъматдир. Ушбу неъматни эъзозлаган ҳолда ҳар бир инсон ён-атрофида бўлаётган воқеа ва ҳодисаларга ибрат назари билан қараши керак. Аллоҳ таоло Қуръони каримда: "...Қасамки, агар (берган неъматларимга) шукр қилсангиз, албатта, (уларни янада) зиёда қилурман, борди-ю, ношукрлик қилсангиз, албатта, азобим (ҳам) жуда қаттиқдир" ("Иброҳим" сураси, 7-оят) дея таъкидлаганлар. Бундан кўринадики, ҳар биримиз, кексамизми, ёшмизми юртимиз тинчлигини сўраб дуо қилишлигимиз лозим.

Ҳабибуллоҳ АБДУЛҲАЕВ,

Саййид Муҳйиддин Махдум номидаги Андижон

ислом ўрта махсус билим юрти талабаси.