МУЛОҲАЗА

САЛОМАТЛИГИМИЗ ЎЗ ҚЎЛИМИЗДА

Саломатлик - энг катта бойлик эканини инсон ёши ўтиб борган сари теранроқ ҳис қилиб бораркан. Маҳалламизда кайвони онахон яшайди. Серфарзанд, сердавлат. Юз билан юзлашганига қарамай, ҳамон тетик, бардам. Уларнинг ёнларига кўп кираман. Узоқ суҳбатлашиб ўтирамиз. Мен ҳам фарзандларим, набираларимнинг соғлиги ҳақида қайғуриб, улардан маслаҳат сўрайман. Онахон "Саломатлик ўз қўлимизда, меҳнат, ҳаракат ва кўнгил хотиржамлигида" дейди.

Дарҳақиқат, онахон ҳақ. Ёшим элликдан ошди. Шукрки, саломатлигим у қадар безовта қилмайди. Чунки ҳаракатдан, меҳнатдан куч оламан. Биринчи навбатда тозаликка, саришталикка эътибор бераман. Буюк табиб Ибн Синонинг "Чанг ва ғубор бўлмаганда эди, инсон минг йил яшаган бўларди" деган фикрларига амал қилишга интиламан. Чунки чанг орқали организмга турли инфекциялар тушиши ва улар касаллик чақириши мумкин. Озода жойда соғлик ҳам, ободлик ҳам бўлаверади.

Меҳнат инсонни чиниқтиради. Чиниққан тана эса касалликларга, толиқишга қарши тура олади. Шунинг учун ҳам ҳозиргача ва бундан кейин ҳам кучим етганича жисмоний меҳнат қилишга ҳаракат қиламан. Ахир инсон ўз саломатлиги учун ўзи қайғуриши керак. Касалликни даволагандан кўра унинг олдини олган яхши эканини ҳар бир киши ҳамиша ёдда тутиши лозим.

Ўғилхон ХАЛИЛОВА,уй бекаси.