АЁЛЛАР ГЎЗАЛ БЎЛИШГА МУНОСИБ

Оламда гўзалликдан бебаҳра аёлнинг ўзи йўқ. Аёл ўзига вақт ажрата билиши керак, холос. Болалигимдан тадбиркор бўламан, гўзаллик салони очиб, опа-сингилларимизнинг янада чиройли бўлишлари учун хизмат қиламан, дея астойдил ният қилардим. Мактабни тамомлагач, шаҳримиздаги малакали косметолог Жамилахон Аҳмедовадан замонавий пардоз усулларини мукаммал ўрганишга ҳаракат қилдим. Кейинроқ пойтахтдаги "Шарм" гўзаллик салонида малака ошириб қайтдим.

2002 йилда шаҳар ҳокимлиги кўмаги билан шаҳар марказида бўш турган бинони ижарага олиб, "Эркиной" гўзаллик салонини ташкил этдим. Ҳозирда 6 нафар қизларни иш билан таъминлаб, улар билан бирга шаҳримиз хотин-қизларининг гўзал ва ораста бўлишлари учун хизмат кўрсатяпмиз. Жорий йилда фаолиятимни янада кенгайтириб, қиз-аёллар либослари сотувини ҳам йўлга қўйдим.

Аёл нимага интилса, эзгулик билан қадам ташласа, мақсадларига, албатта, етишини бугун фаолиятим давомида ҳис қиляпман. Дунёдаги барча аёл гўзал бўлишга, эъзоз топишга муносиб. Биз уларга хизмат кўрсатаётганимиздан беҳад мамнунмиз.

Эркиной АБЖАЛИЛОВА,

Хонобод шаҳридаги "Эркиной" гўзаллик салони раҳбари.