ФАХР

МУСТАҚИЛЛИК - УЛУҒ НЕЪМАТ

Бугун юртимиз мустақиллигининг 25 йиллик тўйи арафасида турибмиз. Ушбу шукуҳли, байрамона кунларда қалбларимиз севинч ва шодликка тўлган. Ёши кекса момолар ва боболаримиз бундай дориломон кунлар учун шукрона келтиришдан чарчамайди. Чунки улар бу кунларнинг қадрини ҳаммамиздан-да чуқурроқ англайдилар.

Бугунги кун ёшлари эса ўзларига яратиб берилаётган кенг имкониятлар, кўрсатилаётган эътибор ва ғамхўрликлардан самарали фойдаланиб, юксак марраларни, улкан чўққиларни забт этишга интилмоқдалар. Куни кеча якунига етган ёзги олимпиада ўйинларида, асосан, ёшлардан ташкил топган мамлакатимиз жамоаси 4 олтин, 2 та кумуш ва 7 та бронза медалини қўлга киритиб, умумжамоа ҳисобида 205 давлатнинг орасида 21 поғонани банд этгани юртимизда спортни ривожлантиришга, ёшларни қўллаб-қувватлашга кўрсатилаётган эътиборнинг ёрқин намунасидир.

Йигирма беш йил ичида юртимизда асрларга татигулик улкан ўзгаришлар амалга оширилди. Жуда катта ҳажмдаги бунёдкорлик ишларига бевосита гувоҳ бўлдик. Бугун ҳар жабҳада эркин фаолият юритиб, исталган маррани эгаллашимизга имкон мавжуд.

Биз ёшлар йигирма беш йил илгари ёшларга бу қадар эътибор, аёлларга эъзоз, қарияларга бугунгидек ҳурмат кўрсатилмаганлиги ҳақида кўп эшитамиз. Бугун эса аксинча бу юртда инсон қадри юксак қадрият даражасига кўтарилди. Шу ўринда ҳақли бир савол туғилади. "Кеча ким эдигу, бугун ким бўлдик?! "Ёши катта бобо ва бувиларимизга бу саволни берсак, "Озод юртнинг озод фарзандисизлар, биз кўрган кунларни сизлар кўрманглар" дея кўзларига ёш оладилар, сўнг қўлларини дуога очиб, Ватанга хизмат қиладиган, жамиятга нафи тегадиган оқил ва доно бўлиб улғайинглар, деб иқболимизни тилайдилар.

Ҳа, мустақиллик улуғ неъмат. Буни кексаларнинг юзидаги мамнунликдан, гўдакларнинг беғубор кулгусидан, ёшларнинг ғайрат ва шижоатидан англаш мумкин.

Ватанимизга, тинчлигимизга кўз тегмасин, мустақиллигимиз абадий бўлсин. Азиз тенгдошлар, она юртимизни жондек асраб-авайлайлик. Зеро, Ватан онамиз каби муқаддас, отамиз каби улуғдир.

Мадинабону ИБРОҲИМОВА.