Бизнинг суҳбат

ҲАЁТ БИЛАН ҲАМНАФАСЛИК

Бугунги депутатнинг аввалгилардан фарқи унинг ҳаётга ҳамоҳанглиги, дунёқарашининг кенглиги, муҳими, одамлар орасида юриб, халқнинг орзу-истаклари, талаб ва эҳтиёжлари билан қизиқишига қараб изоҳланади.

Хўш, бугунги депутат бу борада қандай иш олиб боряпти? Шу хусусда 14-Балиқчи сайлов округидан вилоят кенгаши депутатлигига сайланган педагогика ижтимоий-иқтисодиёт коллежи директори Малоҳатхон Яқубова билан суҳбатда бўлдик.

- Жамиятимиз ҳар бир депутатнинг фаоллигини оширишни, фуқароларимиз турмуш даражасини яхшилаш учун изланиб ишлашини талаб қилмоқда. Бу борада сизнинг олиб бораётган ишларингиз?

- Учта сайлов - Балиқчи, Гулис¬тон ва Бўстон қишлоқ фуқаролар йиғини ҳудудидаги сайлов участкаларидан депутат қилиб сайланганман. Демак, ана шу ҳудуддаги инсонларнинг қалбига кириб бориш, уларни қийнаётган муаммоларига ечим топиш, оғирини енгил қилиш учун ўз ваколатим даражасида халқ билан ҳамнафас бўлиш маъсулияти мени ҳар қадамда ҳушёрликка чорлайди.

Ишни энг чекка ҳудуд - Эшон қишлоқда яшовчи аҳолининг турмуш даражаси билан танишишдан бошладим. Коллеж талабалари билан пахта йиғим-терим ҳашарини ўша ерда ўтказдик. Бу мен учун аҳолининг ичига кириб бориш, ҳаёт тарзини, яшаш шароитини ўрганишда катта имконият бўлди. Қишлоқнинг асосий кўчалари ҳам асфальт қилинмаганлиги учун аҳолига қийинчилик туғдираётганидан воқиф бўлдим. Ҳозир ҳудуддаги 17-умумтаълим мактабигача бўлган йўлни асфальтлаштириш ҳаракатида юрибман. Бу ишда маҳалла фуқаролар йиғини раиси Мирзайўлдош ака билан бамаслаҳат иш юритяпмиз.

Шунингдек, ҳудудимиздаги кам таъминланган оила фар-зандларининг 70 нафарига коллежимизда Янги йил байрами ўтказиб бердик. 14 январь Ватан ҳимоячилари куни муносабати билан Чумчуқёрдаги ҳарбий қисмда хизмат қилаётган аскарлар билан коллеж ўқитувчилари ўртасида "Қувноқлар ва зукколар" кўрик-танловини коллежнинг ўзида ташкил қилдик. Уларга аталган байрам совғамизни топширдик.

- Бугунги кунда қишлоқ жойларида хотин-қизларни ишга, ҳунарга жалб қилиш, ишчи ўринлари яратиш асосий вазифалардан бирига айланган. Сиз бу борада уларга қандай кўмак беряпсиз?

-Қишлоқларимизда аҳоли асосан, чорвачилик ва деҳқончилик билан шуғулланишади. Хотин-қизларни ишга жалб қилиш учун спорт буюмлари тикадиган цех очиб бериш ниятидаман. Бунинг учун Хўжаобод спорт буюмлари фабрикаси директори Фарҳодбек Одилов билан шартнома қилдик. Энди ҳамкорликда шуни очиш ҳаракатидамиз. Шу ерлик фуқаро номига кредит олиб, 10 та ишчи ўринлари яратишни мўлжаллаяпмиз. Ҳозирда ишлайман деган хотин-қизлар фабрикага бориб, иш ўрганяптилар.

Шунингдек, ҳудуддаги ёшларга, айниқса коллеж битирувчиларига тадбиркорлик билан шуғулланиши учун "Микрокредитбанк" туман филиалидан кредит олишига амалий ёрдам кўрсатилди. Олинган кредит асосида очилган янги цех ишга тушиш арафасида турибди.

- Маълумки, депутат ўз сайловчилари билан тез-тез учрашиб, улар билан ҳамнафас ишлаши керак.Шундай эмасми?

-Албатта, биз депутатлар жойларда қатор тадбирлар ўтказиб боряпмиз. Унда асосан, қабул қилинаётган қонунлар моҳиятини оммага етказишга ҳаракат қиляпмиз. Бу борада Қонунчилик палатаси депутати Абдуманноп Раҳимовнинг сайловчилар билан учрашувини ҳам ўтказдик. Ана шундай йиғинларда кўтарилган фикр-мулоҳазалар ҳам халқимиз нечоғли янгиликка, эртанги кунга интилишини кўрсатди. Айниқса, партия фаоллари жамиятда аёлларнинг сиёсий фаоллигини ошириш ҳақида куюнчаклик билан сўзладилар.

- Депутатнинг бугунги вазифаси нимадан иборат? У қандай бўлиши лозим, сизнинг¬ча?

-Бугунги депутат ўз устида ишлаши, маънавий бой бўлиши, халқимиз эртасини куюнчаклик билан ўйлаши, юрт, Ватан тушунчаларини ёш авлод руҳиятига сингдириб боришга интилиши муҳим вазифадир. Биз ҳам ана шу масъулиятли вазифани сидқидилдан бажариш ҳаракатидамиз.

- Суҳбатингиз учун раҳмат!

Суҳбатдош : З.ЎРИНБОЕВА.